Хар тэнгисийн эрэг дэх Сочи хотноо өвлийн XXII олимпийн наадам маргааш нээлтээ хийх гэж байна. 2014 оныг бэлгэдэж 20:14 цагт нээлтээ хийхээр товлосон “Сочи-2014”-ын галт бамбар тун удахгүй бадамлах гэж буй. Олимпийн тосгонд улс орнуудын туг, далбаа мандаж, дэлхийн өнцөг булан бүрээс олимпийн наадмыг сурвалжлах сэтгүүлчдийн баг, олимпийн талбарт өрсөлдөх тамирчдын түрүүч, албаны хүмүүс Сочид цуглаад байна. Алан хядах тухай заналхийлэл, дотоод зөрчил, дипломат сөргөлдөөн гээд элдэв саад бэрхшээл, айдас түгшүүр дунд Сочигийн олимп эхлэхэд нэгэнт бэлэн болжээ. Харамсалтай нь, олимп нээлтээ хийгээгүй байхад Сочийг тойрсон янз бүрийн асуудал, сөрөг мэдээлэл хангалттай цацагдаж эхэллээ. ОХУ-ын талаас олимпийн бүтээн байгуулалтад 51 тэрбум ам.доллар зарцуулсан гэх ч зочдыг хүлээн авах зочид буудлууд гүйцэд ажилд ороогүй л байна. Олимпийн зочид, ялангуяа олон улсын сэтгүүлчид цоргоноос гоожих зэвтэй ус, зарим өрөө нь бүр усгүй, хэрэв ус гоожвол нүүрээ битгий угаагаарай, хорт бодистой гэх сануулга, гудамжинд хаа сайгүй холхих золбин ноход, цахилгаан шат ажиллахгүй үед ядаж шат ч байхгүй гээд олон зүйлийг шүүмжилж байна. Зарим нэг нь Сочи, ОХУ энэ олимпийг зохион байгуулснаар дэлхийн шившиг болж буйг ч онцолсоор… Гэхдээ олимп болдгоороо болно, одоо бүгдийг өөрчлөхөд хэдийнэ оройтсон.

Сочид байдал ямаршуухан байгаа талаар сэтгүүлч, сурвалжлагч, албаны хүмүүсийн оруулсан гэрэл зургуудаас хүргэе.