“Science Translational Medicine” сэтгүүлд мэдээлснээр Ромын “Gemelli” эмнэлгийн эмч нар бичил цахилгаан электродуудыг хүний тохой болон төв мэдрэлийн судалд байрлуулснаар хиймэл гарнаас ирэх дохио хүнд барьж буй зүйлсийн мэдээллийг дамжуулах боломжтой болжээ. Өөрөөр хэлбэл, хиймэл гартай хүмүүс бусдын адил барьж буй юмныхаа хэлбэр дүрс, зөөлөн хатуу, хурц, мохоо зэргийг мэдрэх боломжтой болсон гэнэ. Ийнхүү роботон хиймэл гартай хүмүүс лонхыг бейсболын бөмбөг, жимс зэргээс хооронд нь ялгах боломжтой болсон аж.

Түүнчлэн хиймэл гарны хуруунуудын үзүүрт дохиологч суулгаж өгснөөр хуруугаараа хүрч буй зүйлсийн мэдээлэл хүний мэдрэлд дамжиж буй аж.  Энэ аргаар бүтээсэн хиймэл роботон гарыг Данийн иргэн Деннис Аабо Соренсен гэгч туршиж үзээд “Энэ яг энгийн гар шиг бүхнийг мэдрэхэд ойрхон иржээ. Үнэхээр гайхамшигтай” хэмээн ярьсан байна. Туршилтанд оролцсон Деннис Аабо Соренсен нь 10 жилийн өмнө салют дэлбэрсэн ослын улмаас зүүн гараа алдсан аж. Эрдэмтэд цаашид роботон хиймэл гарыг улам сайжруулж, энгийн хүний гар шиг мэдрэмжтэй болгохоор ажиллаж байгаа юм байна.