Украины парламент дахь сөрөг хүчний гишүүд үндсэн хуулинд өөрчлөлт оруулах саналыг оруулж иржээ. Украины сөрөг хүчнийхэн үндсэн хуулийн өөрчлөлтөөр дамжуулан Ерөнхийлөгч Виктор Януковичийн эрх мэдэл, бүрэн эрхийг хязгаарлахыг хичээж буй аж. Украины үндсэн хуулинд өөрчлөлт оруулах асуудал нь өнгөрсөн сард Виктор Януковичтой хийсэн хэлэлцээрт сөрөг хүчнийхний тавьсан гол шаардлага байжээ. Сөрөг хүчнийхэн Украины үндсэн хуулийг 2004 оны үеийнх рүү буцаахыг хүсч байгаа аж. Ингэснээр Виктор Янукович 2010 оны сонгуулиар ялалт байгуулж, Ерөнхийлөгч болсноосоо хойш олж авсан зарим төрлийн эрх мэдлээ алдах юм.

Виктор Янукович өнгөрсөн арваннэгдүгээр сард Украиныг Европын холбоонд нэгтгэх гэрээнээс татгалзсанаас  Ерөнхийлөгчийнх нь суудал нь ганхаж эхлээд буй юм. Украины ард иргэд түүнийг улс орны ашиг, сонирхлын эсрэг шийдвэр гаргасан хэмээн буруутгаж огцрохыг шаардаж, жагсаж эхэлжээ. Үүний дараа Украины хууль тогтоогчид тэдний эсэргүүцлийг хумихыг тулд жагсаал, цуглааны эсрэг хууль баталсан ч иргэдийн хүчтэй эсэргүүцэлтэй тулгарч, бүхлээрээ огцрох өргөдлөө өгсөн билээ. “12 харгис” хэмээн нэрлэгдсэн жагсаал, цуглааны эсрэг хуулийг эсэргүүцсэн мөргөлдөөн, үймээн самууны үеэр өнгөрсөн сард Украинд зургаан хүн нас барсан юм.