Улсын хөдөлмөрийн салбарын бодлогын судалгаа хийх, урт хугацаанд баримтлах бодлого боловсруулах ажлын хүрээнд Хөдөлмөрийн яам АНУ-тай хамтран ажиллаж, туршлага судлахаар болжээ. Ийнхүү АНУ-ын “РЭНД” корпорацийн хамтран ажиллах гэрээнд Хөдөлмөрийн сайд Я.Санжмятав, тус корпорацийн ерөнхийлөгч Чарли Рөүз нар гарын үсэг зурсан байна. Энэхүү гэрээг байгуулснаар Монголын хөдөлмөрийн салбар дахь саад бэрхшээлүүдийг судалж түүнийг амжилттай даван туулах арга замыг тодорхойлох ажээ.

Манай хөдөлмөрийн зах зээлийг хөгжүүлэх судалгааны төслийг Харвардын их сургуулийн доктор, Ховард Шатц, Стэнфордын их сургуулийн доктор Лоу Констант нар хамтран удирдах бөгөөд АНУ-ын талаас таван эрдэмтэн оролцох юм байна. Энэхүү гэрээг хэрэгжүүлэх үүргийг Монголын талаас Хөдөлмөрийн яамны харъяа хөдөлмөрийн судалгааны институт хариуцах бөгөөд тус байгууллагын таван судлаач хамтран ажиллаж энэ хугацаанд бодлого боловсруулах чадавхиа бэхжүүлэхэд анхаарах ажээ.

1000 гаруй эрдэмтдийг нэгтгэн ажиллуулдаг АНУ-ын “РЭНД” корпораци нь 1948 онд байгуулагдсан бөгөөд эрүүл мэнд, боловсрол, олон улсын харилцаа, хүрээлэн буй орчин, аюулгүй байдал, нийгмийн асуудлын хүрээнд судалгаа шинжилгээний ажил хийж Засгийн газруудад зөвөлгөө өгдөг ашгийн бус байгууллага аж. Тус байгууллага нь 60 жилийн турш АНУ-д болон болон бусад орнуудад бодлого боловсруулахад нь туслалцаа үзүүлж ирснээс гадна сүүлийн 20 гаруй жил БНХАУ, Катар, Курдстан зэрэг хөгжиж буй орнуудтай хамтран ажилласан олон жилийн туршлагатай талаар албаныхан онцоллоо.