-Өлсгөлөнд 33 хүн нэгдэх гэж байгаа гэсэн үү. Өндөр настай цөөнгүй байгаа гэсэн.Тэдний биеийн байдал ямар байна?
– Анх долоон хүн өлсгөлөн зарлаж эхэлсэн. Өчигдөр 27 хүн нэмэгдэж одоогийн байдлаар нийт 34 хүн өлсгөлөнд оролцож байна. Бид өлсгөлөн зарлаад зургаа хонож байна. Одоогоор их сульдсан , суурь хууч өвчнүүд сэдэрч байгаа нь илэрч байна. Гэхдээ бид гэрт байгаа учир харьцангүй гайгүй байна. Наад зах нь гал түлж дулаацаж байна. Харин гадаа байгаа хүмүүс их хүнд байна.
– Та бүхэн өлсгөлөнгөө зогсоох бодол байна уу. Тавьж буй шаардлагад ямар нэгэн хариу ирсэнүү?
– Одоогоор бидний шаардлагад албан ёсны хариулт өгөөгүй байна. Өглөө УИХ-ын гишүүн Э.Мөнх-Очир бидэнтэй ирж уулзсан. Ард түмний саналыг хүндэтгэх ёстой. УИХ-аар санал хураалтын талаар хэлэлцэх нь зүйтэй гэж хэлж байгаагаа хэлээд гишүүдтэй хэлэлцэнэ гэж мэдэгдсэн. Бидний болон ард түмний шаардлагыг биелүүлж бүх нийтийн санал асуулгыг явуултал өлсгөлөнг үргэлжлүүлэх болно.
– Өлсгөлөнд оролцогчдынн 20 нь өлсгөлөнгөө зогсоож байгаа гэсэн мэдээлэл ирсэн. Мөн Ховд аймгийн дэмжигчид нутаг буцсан гэсэн ?
– Энэ бол бидний тэмцлийг зогсоох гэсэн явуулга, цуурхал юм. Өлсгөлөнд хүмүүс нэмэгдэж байгаа болохоос хасагдаагүй. Ховдоос өчигдөр таван хүн нэмэгдэж ирсэн. Суултанд бүх аймгийн төлөөлөл болсон 80-90 иргэн оролцож байна. Эдний дотор 5-ны өдрөөс хойш суултанд оролцож байгаа 92 настай ч хүн байгаа.
– Хэрвээ та бүхний тавьсан шаардлагыг биелүүлэхгүй, бүх нийтийн санал асуулгыг явуулахгүй гэж шийдвэрлэвэл цаашдаа ямар арга хэмжээ авах вэ?
– Мэдээж ард иргэдийн хүсэлт шаардлагыг хүндэлнэ гэж найдаж байна. Дөнгөж сая Тусгаар тогтнол хөдөлгөөний зохицуулагч Л. Баярхүү , Л.Цог УИХ-ын гишүүн З.Алтай , С.Оюун , Д.Энхбат нартай уулзахаар явсан. Хэрвээ санал асуулгыг явуулахгүй татгалзсан хариу өгсөн тохиолдолд хийхээр төлөвлөсөн ажил байгаа. Энэ бүхнийг цаг тухайд нь та бүхэнд мэдээллэх болно.
Ө.Чинзориг