Украины Ерөнхийлөгч Виктор Янукович үргэлжилж буй бослого, үймээнийг намжаахын тулд сөрөг хүчнийхэнтэй тохиролцсоны дагуу шат дараатай арга хэмжээг авч хэрэгжүүлсээр байна. Огцрох өргөдлөө өгөөд буй Ерөнхий сайд Николай Азаров тэргүүтэй Украйны Засгийн газар өчигдөр /I.29/ босогчдыг суллах зорилготой өршөөлийн хуулийг баталжээ. Украины хууль тогтоогчид өчигдөр оройн хуралдаанаараа өршөөлийн хуулийг олонхийн саналаар баталсан бөгөөд үүнд сөрөг хүчнийхэн санал өгөхөөс түдгэлзжээ. Учир нь Ерөнхийлөгч Виктор Янукович босогчдыг суллах сөрөг хүчнийхний шаардлагын хариуд тэднийг Засгийн газрын ордоныг бүслэхээ зогсоож, барилгыг тойруулан тавьсан хаалт хаашилтаа зайлуулах нөхцөл тавьсан билээ. Түүнчлэн Украины хууль тогтоогчид Засгийн газрын эсрэг эсэргүүцлийг зогсоохын тулд баталсан “12 харгис” гэж нэрлэгдсэн жагсаал, цуглааны эсрэг хуулиа цуцлаад буй юм.

Украинд үүсээд буй эсэргүүцэл, бослого үймээн өнгөрсөн аравнэгдүгээр сард Ерөнхийлөгч Виктор Янукович тус улсыг Европын холбоо, чөлөөт худалдааны гэрээнд нэгтгэхгүй байх шийдвэрээс эхтэй юм. Жагсагчид Виктор Януковичийг ОХУ-ын нөлөөнд автаж, улс орны ашиг сонирхлын эсрэг шийдвэр гаргасанд буруутган огцрохыгн шаарджээ. Яг энэ үед ОХУ-ын Ерөнхийлөгч Владимир Путин Украинд 15 тэрбум ам.долларын эдийн засгийн тусламжийн гэрээг Виктор Януковичтой байгуулснаар түүнийг ацан шалаанд оруулж орхив. Гэсэн ч харьцангуй тайван үргэлжилж байсан эсэргүүцлийг хумих зорилгоор Украины эрх баригчид жагсаал, цуглааны эсрэг хууль баталснаар ард олны уур хилэн Засгийн газрын эсрэг чиглэж, огцрохыг шаардсан билээ.

Түүнчлэн Украины Засгийн газрын огцрох шийдвэртэй зэрэгцэн Европын холбооны Гадаад хэргийн дарга Кэтрин Эштон өчигдөр Киевт айлчисан нь ОХУ-ын эгдүүцлийг төрүүлжээ. ОХУ-ын хувьд Украины Засгийн газар огцорсон тул шинэ засаг бүрэлдтэл тусламжийн гэрээгээ саатуулах шаардлагатай болсон байна.