УМБГ-ын гадаа морьтой жагсана гэв

Хуучирсан мэдээ: 2011.05.05-нд нийтлэгдсэн

УМБГ-ын гадаа морьтой жагсана гэв

Сүхбаатарын талбайд морьтой жагсч, хөсөг тэргээр найман гэр ачиж барьсан эх оронч, жинхэнэ “сүй­хээтэй” залуус бол “Гал үндэстэн” холбоо, Монголын гол нууруудын нэгдсэн хөдөлгөөнийхөн. Өнгөрөгч сарын 11-нээс морьтой жагсаал хийж,  долоо хоногийн дараа төв тал­байд гэрүүдээ барьж чадсан юм. Цагдаагийнхан гэрүүдийг алба­дан буулгаагүй харин 100 гаруй морь­дыг төв талбайгаас гаргах талаар тохиролцоонд хүрсэн. Харин энэ са­рын 02-нд “Гал үндэстэн” холбооны Удирдах зөвлөлийн гишүүн Н.Давааг УМБГ-аас албадан саатуулсан нь “Гал үндэстэн” холбооны гишүүд дэмжигчдийг дахин морьдоо оруулж ирэхийг шаардахад хүргэжээ. Тэд энэ сарын  03-нд  Баянзүрх дүүр­гийн  нутаг дэвсгэр чулуутын ам гэх газ­­раас морьдоо Сүхбаатарын талбайд оруулж ирэхээр явж байгаад цагдаагийнхны эсэргүүцэлтэй тул­гар­сан байна. Хөдөлгөөнийхөн, цаг­даа нарын дунд мөргөлдөөн болж цус  урсгахдаа хүрсэн гэх мэдээлэл ч байгаа юм.

Үйл явдлын эргэн тойрон дахь асуудлаар “Гал үндэстэн” холбооны удирдах зөвлөлийн гишүүн М.Баатархуягаас тодрууллаа.

-Цагдаагийнхан, та нарын дунд  мөр­гөлдөөн болсон гэх мэдээ­лэл үнэн үү?

-Өчигдөр өглөө 08.30 цагийн үед “Ургах наран” хорооллын ойролцоох Чулуутын ам гэх газраас морьдоо  аваад хотын төв рүү оруулж ирэхээр явж байтал цагдаа нар бүсэлсэн.  Баянзүрх дүүрэг, нийслэлийн Хө­дөл­­­гөөнт эргүүлийн газрынхнаас бүрд­сэн 100 гаруй цагдаа байсан байх. Цагдаа нар бидний унаж явсан морьдыг хүчээр авч Солонгосын нэг компанийн хашаанд хийсэн. Бид­ний зүгээс морьдоо авахын тулд то­дорхой хэмжээгээр эсэргүүцлээ илэрхийлсэн. Гэхдээ бид үүрэг гүйцэтгэж байгаа төрийн цагдаатай гар зөрүүлээгүй,  мөргөлдөөн болоо­гүй. Цаашид ч болохгүй байх.

-Морьдоо авах арга байна уу?

-Цагдаа нар үнэндээ морьдыг хү­чээр дээрэмдсэн учраас ойрын хугацаанд морьлоо буцааж авна. Ямар ч байсан  эхний удаад 18 морио авсан. Одоо тэр хашаанд 13 морь бий. Цагдаа нараас авсан морьдоо таван буудлын ойролцоо авчирсан байгаа.

-Та бүхэн Удирдах зөвлөлийн гишүүн Н.Давааг суллахыг шаар­­­­­­­­даж байгаа. Гэтэл хууль хя­налтынхан Н.Давааг албадан саа­туулсан нь жагсаал цуглаан, хэлэлцүүлэгтэй холбоогүй гэх тайлбарыг өгсөн?

-Бид “Гал үндэстэн”  холбооны Удирдах зөвлөлийн гишүүн Н.Да­вааг суллахыг шаардсаар байна. Түү­нийг Анод банкны хэрэгтэй холбогдуулан саатуулах байсан вюм бол яагаад  одоо баривчилж байгаа юм  бэ. Өмнө нь албадан саатуулах хугацаа байсан шүү дээ. Үүнд улс  төрийн ашиг сонирхол байгаа нь гарцаагүй.

-Н.Даваа та нарын хэлэлцүүлэг жагсаалыг санхүүжүүлсэн гэх мэ­дээл­­­лийг тодруулаач. Ер нь танай холбоо хаанаас санхүүжиж байна вэ?
-Бид олон түмний тусламж дэмж­лэгээр өнөөдрийг хүртэл явж байна. Бидний тэмцэл, санаачлагыг дэмжих хүмүүс тодорхой хэмжээний мөнгө хандивладаг. Н.Даваагийн хувьд манаай хэлэлцүүлэг, жагсаал цуглааныг дэмжээд тодорхой хэмжээний хандив өгсөн гэдгийг нуугаад яахав. Цаашид ч энэ тал дээр тусална гэж байсан.

-МУГЖ дуучин С.Жавхлан танай Удирдах зөвлөлийн гишүүн. Гэтэл та нарыг хоёр долоо хоног талбай дээр хоноход нэг ч удаа харагдсангүй. Өрх тусгаарласан юм уу?

-Дуучин С.Жавхлан “Гал үндэс­тэн” холбоог үүсгэн байгуулсан, ма­най удирдах зөвлөлийн гишүүн. Энэ удаагийн тэмцэлд оролцохоос тат­галзсан. Тэр хүний хувьд уран бү­тээлдээ илүү анхаарч байгаа болов уу.

-Цаашид тэмцэл хэрхэн үр­гэлж­­­­лэх вэ?

-Эхний ээлжинд морьдоо  цагдаа нараас авна. Маргааш/өнөөдөр/ 12.00 цагт хэвлэлийн хурал хийж, цаг үеийн асуудлаар мэдээлэл өгнө. Ямар ч байсан бид морьтойгоо УМБГ-ын гадаа жагсах болно.

С.Отгон

NewsMN Гар утасны хувилбар Татах
NEWS.mn

Мэдээллийн эх сурвалж