Өнгөрсөн даваа гарагт Үндэсний их баяр наадмын тухай хуульд өөрчлөлт оруулах тухай хуулийн төслийг УИХ-ын дэд дарга Р.Гончигдорж, УИХ-ын дарга З.Энхболдод өргөн барьсан.Хуулийн төслийн танилцуулгад дурьдсанаар монголчууд үндэсний их баяр наадмаа тэмдэглэхдээ Эрийн гурван наадам хийж ирсэн эртний уламжлалтай. Эрийн гурван наадам нь манай соёл, иргэншлийн өвөрмөц нэг бүрэлдэхүүн хэсэг юм гээд 2003 онд анх удаа Монгол Улсын Ерөнхийлөгчийн санаачилгаар Үндэсний их баяр наадмын тухай хууль батлагдаж, Монгол үндэсний бөхөд Ерөнхийлөгчийн зарлигаар цол олгодог болсон бөгөөд ингэхдээ анх удаа улсын далай аварга цол шинээр бий болгосон. Энэ нь үндэсний бөхөд байгаагүй цол болсон ба харин цолны чимэг байсан түүхтэй.
Гэтэл өнөөдөр монгол үндэсний бөхийн хөгжил өндөр түвшинд хүрч, өрсөлдөөн их болсон үед далай аварга цол олгож байгаа нь үндэсний бөхийн дархан аварга төрөх боломжийг хомсдуулж байна гэжээ.
Р.Гончигдорж даргын өргөн барьсан Үндэсний их баяр наадмын тухай хуульд өөрчлөлт оруулах хуулийн төсөл олонхын дэмжлэг авч батлагдвал Г.Өсөхбаяр, А.Сүхбат нар Дархан аварга болж, одоо хэрэглэгдэж байгаа далай аварга цол түүх болох юм.
Ийнхүү 60 насны босгоор алхаад удаагүй байгаа Р.Гончигдорж дарга Архангай, Төв аймгийнханд буян үйлдэж 1921 оны Ардын хувьсгалаас хойш төрөн гарсан долоон Дархан аварга дээр Архангай аймгийн Батцэнгэл сумын харьяат Даян аварга Г.Өсөхбаяр, Төв аймгийн Сэргэлэн сумын харьяат А.Сүхбат нарыг нэмэн есөн Дархан аваргатай болох бололтой.
