Энэ онд Булган аймгийн нутаг дэвсгэрт улсын төсвийн хөрөнгөөр ойжуулалт, байгалийн сэргэн ургалтад туслах, “Ногоон хэрэм”-ийн туслах зурвас байгуулах эрхийг аж ахуйн долоон нэгж, нөхөрлөлд олгож гэрээ байгуулан үйл ажиллагааг нь эхлүүлэхээр болов.

Тэдгээр аж ахуйн долоон нэгж, нөхөрлөл нийт зургаан сумын нутагт 400 га талбайд ойжуулалт, 100 га талбайд байгалийн сэргэн ургалтад туслах ажил, таван га талбайд “Ногоон хэрэм”-ийн туслах зурвас байгуулна . Тухайлбал, 120 га-д ойжуулалт, 40 га-д байгалийн сэргэн ургалтад туслах ажлыг “БУЦС” нөхөрлөл Бугат сумын нутагт, 70 га-д ойжуулалт, 60  га-д байгалийн сэргэн ургалтад туслах ажлыг “Заан хүж” нөхөрлөл Хутаг-Өндөр сумын нутагт хийнэ. Мөн Хутагт-Өндөрийн 80 га-д “Ойн таксаци” ХХК, Сэлэнгэ сумын 20 га-д “Зулзаган” нөхөрлөл, 50 га-д “Чубад” ХХК, Хангалын 30 га-д “Монголын ой судлалын сан” төрийн бус байгууллага ойжулалтын ажил хийх бол Булган сумын сум дундын ойн анги  Орхон, Сэлэнгийн 30 га-д ойжуулалт, Дашинчилэн сумын таван га-д “Ногоон хэрэм”-ийн туслах зурвас байгуулах болжээ. Эдгээр ажлыг улсын төсвийн 93,5 сая төгрөгийн хөрөнгө оруулалтаар хийж гүйцэтгэх болно.