УИХ-ын чуулганы хуралдааны үдээс хойшхи хуралдаан Засгийн газрын цагаар үргэлжилсэн юм. Ерөнхий сайд 2013 оны ажлын тайлангаа танилцуулсны дараа УИХ-ын гишүүн Д.Дэмбэрэл “Засгийн газрын 2013 оны тайланг салбар бүрээр нь холбогдох байнгын хороодоор хэлэлцүүлэх нь зүйтэй. Учир нь нэг цагийн дотор Засгийн газрын хийсэн ажлыг дүгнэх боломжгүй” гэсэн юм. Үүний дараа  Хуульчийн эрх зүйн байдлын тухай хууль, Галт зэвсгийн тухайн, Хуулийн этгээдийн улсын бүртгэлийн тухай хуулийн төслүүдийг хэлэлцэж эхэллээ. Хуульчийн эрх зүйн байдлын тухай хууль болон түүнийг дагалдах хуулийн төслүүдийг хэлэлцэх эсэхийг хэлэлцэн дэмжиж, Хууль зүйн байнгын хороонд шилжүүллээ.

Үүний дараа  Галт зэвсгийн тухай хуулийн шинэчилсэн найруулгын төсөл, түүнийг дагах хуулийн төслүүдийг хэлэлцэх нь зүйтэй гэж үзлээ. Энэ хуулийг дагалдаж, Галт зэвсгийн албан татварын тухай /шинэчилсэн найруулга/, Аж ахуйн үйл ажиллагааны тусгай зөвшөөрлийн тухай хуульд нэмэлт, өөрчлөлт оруулах тухай, Захиргааны хариуцлагын тухай хуульд өөрчлөлт оруулах тухай, Улсын тэмдэгтийн хураамжийн тухай хуульд нэмэлт, өөрчлөлт оруулах тухай, Галт зэвсгийн тухай тухай хууль хүчингүй болсонд тооцох тухай, Галт зэвсгийн албан татварын тухай хууль хүчингүй болсонд тооцох тухай, Эрүүгийн хуульд өөрчлөлт оруулах тухай, Амьтны тухай хуульд өөрчлөлт оруулах тухай хуулийн төслүүд орж ирж байгаа юм. Хуулийн төслийн талаар гишүүд асуулт асууж, тодруулга авсны дараа санал хурааж, 71 хувийн саналаар дэмжсэнээр Хууль зүйн байнгын хороонд шилжүүллээ.