АНУ-ын Үндэсний аюулгүй байдлын албаны (NSA) зохисгүй ажиллагааны талаарх мэдээлэл өдрөөс өдөрт дэлхий дахинд ил болсоор байгаа билээ. Тус албаны тагнуулын газрын экс ажилчин Эдвард Сноудений хулгайлсан олон мянган материалууд хэвлэлийнхнээр дамжин олонд дэлгэгдэх тусам АНУ-ын Үндэсний аюулгүй байдлын албатай /АҮАБА/ холбоотой асуудал улам томорсоор байна. Сүүлд гэхэд Их Британийн “Guardian”, “Channel 4 News” зэрэг хэвлэлд АҮАБА өдөрт дэлхийн олон орны иргэдийн 200 сая  мессежийг өөрийн серверт хуулж, хадгалдаг болохыг нийтэлжээ. Мэдээжийн хэрэг эх сурвалж нь ОХУ-д түр орогнож буй Эдвард Сноуден гэнэ.

Түүнчлэн дээрх мэдээлэлд Их Британийн Засгийн газрын харилцаа холбооны удирдлагуудын зүгээс иргэдийн хүсэлтээр АҮАБА-ын мэдээллийн санд судалгаа хийсэн гэнэ. Үүний үр дүнд АҮАБА-ын “Dishfire” нэртэй хөтөлбөр нь мессежед суурилсан үйлчилгээний аваагүй дуудлагын мэдээлэл, message roaming ашигласан байршил, банкнаас ирүүлсэн санхүүгийн мэдээлэл, төлбөр тооцоо, дансны хуулга, цахим бизнес картын мэдээлэл гэх мэтийг олж цуглуулдаг болохыг мэдээлжээ. Энэ хэргээр АНУ-ын Ерөнхийлөгч Барак Обама өчигдөр /I.16/ Их Британийн Ерөнхий сайд Дэвид Камеронтой ярилцсан байна.

Үүний зэрэгцээ АНУ-ын Ерөнхийлөгч Барак Обама АҮАБА-ны цахим тагнуулын хөтөлбөрийг өөрчлөхөөр төлөвлөж буйгаа асуудал үүссэнээс хойш мэдэгдэж байгаа билээ. АҮАБА нь олон улсын төр, засгийн тэргүүдийн гар утсыг чагнаж байсан гэх мэдээлэл өнгөрсөн онд хамгийн том дуулиан тарьсан юм.