МАН-ын Удирдах зөвлөл өчигдөр хуралдаж түүн дээр УИХ-ын Төрийн байгуулалтын байнгын хорооны хурлаар хэлэлцээд “ухарсан” Сонгуулийн хуулийн талаарх сэдэв хөндөгджээ. Сонгуулийн тогтолцоог шинэчлэх асуудлаар УИХ дахь МАН-ын бүлгийн гишүүд хагаралтай байгаа нь Удирдах зөвлөлийн гишүүдийг нэлээд эмзэглүүлсэн байна. Байнгын хорооны хуралдаан дээр бүлгийн гишүүд телевизийн камерын өмнө тогтолцоог тохироогүй байгаагаа харуулан толхилцсонд МАН-ын удирдлага эмзэг хандаж буй аж. Ингээд Сонгуулийн хуулийн тухай асуудлыг дараа жич хэлэлцэхээр хойшлуулсан байна. Мөн хурлаар зохион байгуулалтын асуудал хэлэлцжээ. МАН-ын төв байгууллагын Хүний нөөцийн хэлтсийн дарга Д.Жадамбааг ажлаас чөлөөлж Г.Цэнгэлийг томилсноор хурал өндөрлөсөн байна.