Эх орноосоо урвасан хэргээр шүүгдэхээр зэхэж буй Пакистаны экс Ерөнхийлөгч Первез Мушарраф эмнэлэгт хүргэгджээ. Өдгөө 70 настай Первез Мушарраф өчигдөр /I.2/ шүүх танхим руу явах замдаа цээжээр нь өвдөж, зовиурласнаас Пакистаны Равалпинди хотын зүрхний өвчин судлалын цэргийн эмнэлэгт хүргэгдсэн аж. Одоогоор эмч нар түүний биед үзлэг, шинжилгээ хийж байгаа гэнэ.  Ийнхүү Первез Мушаррафыг шүүх хурал гурав дахь удаагаа хойшилсон байна. Үүнээс өмнө Пакистаны эк Ерөнхийлөгчийг шүүх хурал аюулгүй байдалтай холбоотой шалтгаанаар хоёр удаа хойшилж байсан билээ.

Экс Ерөнхийлөгч Первез Мушарраф Пакистаны төрийн эрхийг барьж байхдаа  2007 онд онц байдал тогтоохын тулд үндсэн хуулийг түдгэлзүүлсэн шийдвэрийнхээ улмаас эх орноосоо урвасан хэрэгт буруутгагдаад буй юм. Харин тэрээр өөрийг нь буруутгаж буй хэргийг эрс үгүйсгэн, улстөрийн сэдэлтэй хэмээн мэдэгдсээр буй.

Первез Мушарраф нь Пакистаны төрийн эрхийг барьж байсан цэргийн удирдагчид дундаас эх орноосоо урвасан хэргээр шүүгдэх гэж буй анхны генерал аж. Пакистаны шүүхээс түүнийг эх орноосоо урвасан болон бусад хэрэгт буруутай гэж үзвэл бүх насаар нь шоронд хорих юмуу цаазаар авах ял оноох гэнэ. Тэрээр 1999 онд цэргийн эргэлт хийснээр Пакистаны төрийн эрхийг булаан авч байсан бөгөөд 2008 онд ардчилсан сонгуулиар сонгогдсон Засгийн газар нь түүнийг хүсээр огцруулж байжээ. Үүний дараа Первез Мушарраф эх орноосоо гарч, Дубай, Лондон хотуудад амьдарч байгаад 2013 онд Пакистанд эргэн ирснээр баривчлагдсан аж.