Ливийн удирдагч Муамар Каддафийн хэлсэн үгтэй холбогдуулан Италийн засгийн газар улс орны аюулгүй байдлын хяналтаа чангатгах арга хэмжээ авч эхэлжээ. Каддафи хамгийн сүүлд хэлсэн үгэндээ Итали улс НАТО-гийн гишүүн орнуудын Ливийг бөмбөгдөх үйл ажиллагаанд оролцож байгаатай холбогдуулан Ливи, Итали улсын хооронд цэрэг дайны шууд мөргөлдөөн гарч болзошгүй гэж анхааруулсан ажээ.

Энэ тухай Италийн дотоод хэргийн сайд Роберто Марони мэдээлсэн бөгөөд Ливид өрнөж байгаа мөргөлдөөний улмаас ойрын үед ливийн 50000 иргэн Италид хүрэлцэн ирэх гэж байгааг дурдсан байна.

Марони сайд Италийн ерөнхий сайд Сильвио Берлускони Ливийг бөмбөгдөх ажиллагаанд оролцох шийдвэр гаргасанд ихээхэн шүүмжлэнгүй хандсан бөгөөд НАТО-гийн нисэх хүчний бөмбөгдөлтөд Каддафийн хүү, гурван ач нь амь үрэгдсэнийг дурдсан байна.

Дотоод хэргийн сайд “Ливийн удирдагчийн заналхийллийг үл тоомсорлож, суртал ухуулгын чанартай гэж үзэж болохгүй бөгөөд бид аюулгүй байдлын хяналтаа улам чангатгаж байна” гэж дурдсан байна.