“Fox news” телекомпанийн мэдээлснээр бол Осама бен Ладены цогцсыг Америкийн засаг захиргаа тэр даруйд нь мэдэлдээ авчээ. АНУ-ын Ерөнхийлөгч Б.Обамагийн мэдэгдэхдээ энэ үйл явдал Вашингтоны цагаар тавдугаар сарын 1-нээс 2-нд шилжих шөнө болжээ.
Алан хядагч “Аль-Каида” бүлгийн толгойлогч, “Дэлхийн алан хядагч номер нэг” хэмээн дэлхий нийтэд алдаршсан Осама бен Ладеныг Америкийн тусгай хүчнийхэн сөнөөжээ. Цагаан алчуураар толгойгоо ороосон, цагаан нөмрөгтэй, буурал сахалт энэ эрийн зураг сонин хэвлэл, телевизийн дэлгэцээс салалгүй олон жилийг үдэж дэлхийн өнцөг булан бүрийнхний эчнээ танил болсон юм. Зартай алан хядагч Осама сая аргагүй хүчин мөхөсдөн  “Аллах тэнгэртээ” заларчээ. Монголчууд хүнийг үгүй болоход бурхны орондоо одлоо гэдэг. Тэр утгаар нь авч үзвээс Осама бен Ладен “Аллах тэнгэртээ” явсан буй за.
Арав орчим жилийн өмнө, 2001 оны есдүгээр сарын 11-нд АНУ-ын Олон улсын худалдааны төвийн хоёр ихэр цамхгийг дүүрэн зорчигчтой иргэний нисэх онгоцоор дайран нурааж, Пентагоны байранд довтолсны гэм буруутан нь  Осама бен Ладеныг гэдэг. Иймдээ ч зартай алан хядагчийн амь үрэгдсэн тухай дуулсан америкчууд баяр хөөрт умбаж, Вашингтоны иргэд Цагаан ордныг тойрон “АНУ, АНУ” хэмээн уухайлж, улсынхаа далбаагаар даллан, төрийн дууллаа аялцгаажээ.  Энэ долоо хоногийн ажлын эхний өдрийн өглөө гадаадын цахим сайтуудад тавигдсан онцлох мэдээ энэ байв. АНУ-д 2001 оны намар болсон алан хядах үйл явдлаас хойш Осамаг олон ч удаа “үхүүлж, амьдруулсан”  юм. “Үхэшгүй Кашей” гэгчээр аль нэгтэйгээс гараад л ирдэг байв. Хаа байгааг нь олон жил эрэн хайсан бен Ладеныг Пакистаны нийслэл Исламабадаас 60 км-ийн зайд орших Абботабад хот дахь харшдаа байхад нь Америкийн нисгэгчгүй онгоцноос пуужингаар харван хөнөөсөн гэх мэдээлэл байгаа ч далайн явган цэргийн тусгай албаныхан нисдэг тэргээр очин алан хядагчийн гэрт нэвтэрч, харилцан буудалцах үед Осама амь үрэгдсэн гэж өөр нэг эх сурвалж дамжуулав.
Осама бен Ладены харш бүхэл бүтэн цайз байсан гэж нүдээр харсан хүмүүс өгүүлжээ. Түүний харш Пакистаны хамгийн алдартай цэргийн академийн байрны ойролцоо байрладаг ажээ. Түүнтэй хамт хөвгүүдийнх нь нэг, бие хамгаалагч болох өөр бусад хэдэн хүн үрэгдэж хоёр эмэгтэй шархдан Осамагийн хоёр эхнэр, дөрвөн хүүхэд олзлогджээ. Осама хэд хэдэн эхнэр, 19 хүүхэдтэй юм. Тусгай ажиллагааг Барак Обама өөрөө зайнаас шууд удирдан Пакистаны тусгай албаныхан ч хүч хавсарсан ажээ. Ийнхүү олон жил АНУ-ын удирдагчид хийгээд Осама бен Ладены хооронд үргэлжилсэн “Муур хулганадах” тоглоом дуусав. АНУ-ын Ерөнхийлөгч Ж.Бушийн үеэс эхэлсэн хөөцөлдөөн ийнхүү шувтарч, Обамад Осамаг жагсаалаас гаргах хувь тохиов.
Осама бен Ладен хэзээ амь үрэгдсэн нь тодорхойгүй байна. СNN-ийн мэдээгээр бол тэрбээр долоо хоногийн өмнө Афганистанд үрэгджээ. Харин Осама Пакистанд алагдсан гэсэн мэдээллийг Америкийн бусад хэвлэл, мэдээллийн агентлагууд тавдугаар сарын 1-нээс 2-нд шилжих шөнө цацаж эхэлсэн байна. Пакистаны мэдээллийн хэрэгслүүд Осама бен Ладен тавдугаар сарын 1-ний үүрээр тус улсын нутаг дэвсгэрт алагдсаныг баталж байгаа юм. “Fox news” телекомпанийн мэдээлснээр Осама бен Ладены цогцсыг Америкийн засаг захиргаа тэр даруйд нь мэдэлдээ авчээ. АНУ-ын Ерөнхийлөгч Б.Обамагийн мэдэгдсэнээр үйл явдал Вашингтоны цагаар тавдугаар сарын 1-нээс 2-нд шилжих шөнө болжээ.
Түүний үхлийг “Аль-Каида”-д өгсөн шийдвэртэй цохилт, алан хядах үйл ажиллагаатай хийсэн тэмцлийн гурав дахь амжилт” хэмээн гадаад орнуудад үнэлж байна. Афганистанд талибуудтай хийсэн олон улсын эвслийн үйл ажиллагаа, Иракт Садам Хусейний дэглэмийг устгасны дараах гурав дахь амжилт хэмээн Осамагийн үхлийг нэрлэжээ.
Алан хядагчийн амь үрэгдсэн талаар АНУ-ын Ерөнхийлөгч Б.Обама үг хэллээ. Тэрбээр “АНУ-д  халдаж гэм зэмгүй энгийн номхон олон мянган эрчүүд, эмэгтэйчүүд, хүүхдийн үхлийн буруутан болсон Осама бен Ладеныг даран сөнөөлөө. Манайд тагнуулын хангалттай хүч бий гэж үзээд долоо хоног гаруйн өмнө би тусгай ажиллагаа явуулах зөвшөөрөл өгсөн юм. Миний удирдлагын дор өнгөрөгч ням гаригт Пакистаны Исламабад хотоос холгүй газар тусгай ажиллагаа явуулж, Америкийн цэргийнхэн зүйрлэшгүй эр зориг гарган бен Ладеныг устгаж, түүний цогцсыг гартаа орууллаа. АНУ алан хядагчидтай хийх тэмцлээ хэзээ ч мартаж байгаагүй. Есдүгээр сарын 11-нд амь насаа алдагсдын ар гэрийнхэн, төрөл төрөгсөдтэй илүү ойр дотно харилцсаар ирсэн. Тэр үе юу болсныг бид дандаа санан дурсдаг ” хэмээн Б.Обама хэлсэн үгэндээ дурджээ. Ерөнхийлөгч Б.Обама алан хядагчидтай хийсэн тэмцэл нь исламын шашинтай хийсэн тэмцэл биш гэдгийг онцолсон байна. “Осама  бен Ладен мусульман шашинт олон хүнийг хороосон” гэдгийг хэлсэн үгэндээ дурджээ. Барак Обама Ерөнхийлөгч болсныхоо дараа Бин Ладенийг барих эсвэл алах тушаал өгсөн тухайгаа өөрийн хэлсэн үгэндээ дурдлаа.
Түүний хэлж буйгаар 2010 оны наймдугаар сард түүний бүгж байсан байршлыг тогтоосон байна. Улмаар энэ оны гуравдугаар сард тус мэдээлэл нотлогдож, дөрөвдүгээр сарын сүүлээр Бин Ладеныг барих тушаал өгчээ. АНУ-д 2001 оноос түүнийг “номер нэг алан хядагчаар” зарласан бөгөөд баривчлахад тусалж мэдээлэл өгсөн хүнд таван сая ам.доллар амласан билээ. Энэ үеэр Осама бин Ладен Афганистанд байсан бөгөөд “Талибан” хөдөлгөөнийхний хүндэт зочинд тооцогдож байсан юм. Харин АНУ-ын Афганистан дахь цэргийн ажиллагаа эхэлсний дараахан Осама бин Ладен нуугджээ. Тэр үеийн Ерөнхийлөгч Жорж Буш “Бин Ладенийг амьд, үхсэн алин боловч гартаа оруулах болно” гэж байв.АНУ-ын Ерөнхийлөгчийн 2004 оны сонгуулийн өмнөхөн Осама бин Ладен видео бичлэгээр дамжуулж 2001 оны алан хядах үйл ажиллагаанд “Аль-Каида” бүлэг шууд хамааралтай байсныг албан ёсоор мэдэгдсэн  нь гал дээр тос нэмсэн юм.
АНУ-ын Ерөнхийлөгч асан бага Ж.Буш номер нэг алан хядагчийг аюулгүй болгосон америк дайчдад онцгойлон баяр хүргэж “маш чухал ололт амжилт гаргалаа” гэжээ. Есдүгээр сарын 11-ний халдлагын үеэр төрийн эрх барьж байсан АНУ-ын экс Ерөнхийлөгч бага Жорж Буш Осама бен Ладены үхлийг Америкийн хувьд ялалт хэмээн нэрлэлээ. “Терроризмын эсрэг дайн үргэлжилж байгаа. Гэхдээ өнөөдөр үүнд хэр хугацаа зарцуулах нь чухал биш, шударга ёс дийлдэг гэдгийг Америк харуулж чадлаа” гэж тэрбээр хэлжээ.
Нью-Йорк хотын захирагч Майкл Блумберг “Энэ мэдээ есдүгээр сарын 11-нд амиа алдсан иргэдийн ар гэрийнхэн, төрөл төрөгсөдийн сэтгэлийг бага ч болов тайтгаруулах болов уу гэж найдаж байна” гэжээ. Нью-Йорк хотынхон үүнийг арван жил хүлээлээ гэсэн түүний үг үнэн болохыг хөөрч догдолсон хүмүүсийн цуглаан харуулсан юм.
Бага Ж.Бушийн үед Осама бен Ладеныг АНУ-ын гол дайсан хэмээн зарлаж хаана байгааг нь эрэн хайж устгах зорилт тавьж байсан билээ. Түүнийг газар сайгүй хайж Афганистан, Пакистан, бүр Арабын орнуудад байгаа гэсэн таамаг дэвшүүлж байв. Монголд хүртэл Осамаг  “Баян-Өлгийн алсын суманд айлд бүгж байгаа” гэсэн онигоо гарсан юм. Дашрамд дурдахад 2003 оны үед гадаадын цэргийн нэгэн нэртэй сэтгүүлд Осама бен Ладеныг дэлхийд Чингис хааны дараа орох цэргийн том зүтгэлтэн, жанжин хэмээн нэрлэж байсан билээ.

Аюул дуусаагүй

Обама бен Ладеныг устгаснаар алан хядагчдын аюул дууслаа гэж үзэж хэрхэвч болохгүй. Толгойлогчоо алдсан “Аль-Каида” бүлгийнхэн ч зүгээр суусангүй. Тэргүүн сонгох ажилдаа яаравчлан орсон гэж эх сурвалжууд мэдээлж байна.
Иймд АНУ-ын засаг захиргаанаас иргэддээ сонор сэрэмжтэй байхыг анхааруулжээ. Аялал жуулчлалаар явах үедээ болгоомжтой байхыг сануулж, алан хядлагын эсрэг ажиллагаатай холбоотойгоор америкчуудыг онилсон халдлага гарч болзошгүй учраас онц шаардлагагүй тохиолдолд гэрээсээ холдохгүй байхыг зөвлөж байгаа аж.
Гадаад орнуудад байгаа ЭСЯ-дынхаа аюулгүй байдалд ч онцлон анхаарч байна. Москва дахь АНУ-ын ЭСЯ-ыг хүчилсэн хамгаалалтад авчээ. Түүний сацуу Пакистаны талибууд “Осама бен Ладен амьд” гэсэн мэдээлэл цацаж эхлэв. Осамагийн цогцсыг гартаа оруулсан америкчууд түүнийг аль хэдийнэ далайд оршуулсан тухай СNN мэдээллээ. Шарилыг чандарласан бололтой юм. Газарт оршуулбал түүнийг хөдөөлүүлсэн газрыг Осамад дургүй хүмүүс ухаж төнхөхөөс эхлээд “Аль-Каида”-гийхан ч толгойлогчийнхоо цогцсыг авахыг ородох зэрэг элдэв сөрөг гарч болзошгүй хэмээн Америкийн засаг захиргааныхан болгоомжилжээ. Мусальман шашны заншлаар талийгаачийг өөд болсон даруйд шахам нутаглуудаг тул ийнхүү оршуулах ажлыг яаравчлан хийсэн аж.

Баяр хүргэсээр…

Осама бен Ладеныг үгүй хийсэн америкчуудад гадаад орны төр, засгийн тэргүүнүүд баяр хүргэсээр байна. Израилийн Ерөнхий сайд Биньямин Нетаньяху АНУ-г  Осама Бин Ладенийг дарж чадсанд талархал илэрхийлжээ. “Энэ үйл явдал терроризмтай мөр зэрэгцэн тэмцэж буй бүх ардчилсан улс орны хүртэх ёстой  шударга ёс, эрх чөлөө, үнэт зүйлсийн ялалт юм” гэж Нетаньяху хэлсэн бол Их Британи, Умард Ирландын нэгдсэн Вант улсын Ерөнхий сайд Дэвид Камерон Осама Бин Ладений үхэл дэлхий дахины олон хүмүүсийн сэтгэл санааг амраах болно гэжээ. “Бин Ладенийг хороож, түүнийг дэлхий даяар дахин алан хядах үйл ажиллагаа хийж чадахгүй болгосон нь маш том амжилт” гэж тэрбээр мэдэгдсэн байна.
Францын Ерөнхийлөгч Николя Саркози АНУ-ын тэвчээртэй дайчин чанарыг сайшааж  “Осама бин Ладений үхэл терроризмын эсрэг дайны нэгэн чухал үйл явдал боллоо”гэсэн байна.Кенийн удирдагч Раила Одинга “Аль-Каида”-гийн удирдагчийн үхэл арван жилийн өмнө алан хядах үйл ажиллагааны бай болж байсан Кени улсын хувьд сайхан мэдээ юм гэжээ. Тус улсад 2002 оны аравдугаар сард Paradise зочид буудалд болсон дэлбэрэлтийн улмаас 14 хүн амь үрэгдэж 80 гаруй хүн хүнд шархдаж байжээ. Оросын РИА Новости агентлагийн мэдээлснээр Москва хотын цагдаагийн газар АНУ-ын Элчин сайдын яамны байрыг Бен Ладен алагдсантай холбогдуулан хамгаалалтад авснаа зарлав.

Осама бен Ладены тухай товчхон

 Осама бен Ладен 1957 оны гуравдугаар сарын 10-нд Саудын Арабын Жидде хотод төржээ. Эцэг эх нь Йеменээс Саудын Арабад цагаачилсан хүмүүс байв. Арван зургаан настайдаа Саудын Арабын нэгэн алан хядах бүлэглэлд элсэж, барилгын магнат эцгийгээ нас барсны дараа их хэмжээний хөрөнгө өвлөж авсан байна.
Тэрбээр 1979 онд Афганы дайнд оролцож явжээ. Улмаар 1980-аад сүүлчээр “Аль-Кайда” бүлэглэлийг үүсгэн байгуулж, 2001 оны есдүгээр сарын 11-нд АНУ-д болсон алан хядах ажиллагааг зохион байгуулсан гэж үздэг. Осама бен Ладен анхны эхнэртэйгээ 17 настайдаа гэрлэсэн, хэд хэдэн эхнэртэй, 19 хүүхэдтэй ажээ.