Бөх л гэвэл ухаан алдчихдаг байсан тэр үе аль хэдийнэ ард хоцорсон бололтой. Тэр компанийн бөх, энэ компанийн бөх гэж наадмын ногоон дэвжээнээ сүр дуулиан болон цоллуулж ирсэн бөхчүүдээс дутахгүй багийн спортыг ивээн тэтгэдэг моод Монголд дэлгэрчээ. Үүний нэгэн жишээг дурдвал, “Хас” банкныхан “Хасын хүлэгүүд” нэртэй хөлбөмбөгийн багийг ивээн тэтгэж, “Дуулиан-2020” тэмцээнийг зохион байгуулж ирсэн бол төдөлгүй сагсан бөмбөгийн “Хасын хүлэгүүд” багийг дэмжин ажилласаар иржээ.

Хүүхэд, залуусын тоглох дуртай хөлбөмбөг, сагсан бөмбөгийн спортыг дэмжих төдийхнөөр “Хас”-ынханы ажил зогссонгүй. Тиймдээ ч “Хасын хүлэгүүд” хэмээх хоккейн мэргэжлийн багт хөрөнгө оруулжээ. Шинэхэн хоккейн баг нь Эрдэнэт хотод эхэлсэн Монголын Хоккейн лигийн аваргын төлөөх тэмцээнд саяхан оролцоод иржээ. Ийнхүү багийн спортыг дэмжих болсон “Хас”-ынханд гар бөмбөгийн баг ивээн тэтгэх хүсэлтийг ч тавьсан сурагтай. Үүнээс харахад, удахгүй “Хасын хүлэгүүд” хэмээх гар бөмбөгийн баг мэндэлж мэдэхээр байна.