Олон улсын бөхийн төрлүүдийн нэгдсэн холбоо /FILA/-ноос чөлөөт болон сонгомол бөхийн жингийн ангилалд оруулсан өөрчлөлтийн талаар албан ёсоор мэдэгдлээ. Шинэчилсэн жингийн ангилал нь 2016 оны Рио-де-Жанейрогийн олимпийн хөтөлбөрт багтах учиртай юм. Мөн FILA-гаас чөлөөт бөхийн дүрмийн өөрчлөлт, тэмцээн, уралдааны форматыг танилцуулсан байна. Энэ өөрчлөлтийн тухайд 2014 оны нэгдүгээр сарын 1-нээс эхэлж мөрдөх ажээ.

Өмнө нь эмэгтэйчүүдийн чөлөөт бөхийн ангилалд олимпийн жинд дөрвөн жин багтдаг байсан бол хоёрыг нэмж оруулснаараа онцлогтой. Эсрэгээрээ эрэгтэйчүүдийн төрлөөс нэг жинг хасчээ. Ингэснээр Риогийн дэвжээнд чөлөөт бөхийн эрэгтэй, эмэгтэй төрөл, мөн сонгомол бөхийн тус тус зургаан жингийн ангилалд бөхчүүд өрсөлдөх болж байна.

Олимпийн шинэ жингийн ангиллуудыг танилцуулъя.

Чөлөөт бөх /эрэгтэй/: 57, 65, 74, 86, 97, 125 кг

Сонгомол бөх: 59, 66, 75, 85, 98, 130 кг

Чөлөөт бөх /эмэгтэй/: 48, 53, 58, 63, 69, 75 кг

Олимпиос бусад буюу дэлхийн болон тивийн аварга шалгаруулах тэмцээн, Дэлхийн цом, Алтан гран-при зэрэг FILA-гийн тэмцээнүүдэд чөлөөт бөхийн эрэгтэйчүүдийн төрөлд 61 ба 70 кг, чөлөөт бөхийн эмэгтэйчүүдийн төрөлд 55 ба 60 кг, сонгомол бөхийн төрөлд 71 ба 80 кг-ын жингийн ангиллыг нэмж оруулах гэнэ. Харин өсвөр үе болон залуучуудын жингийн ангилалд ямарваа нэг өөрчлөлт оруулаагүй байна.

Барилдааны дүрмийн тухайд зарим нэг өөрчлөлт оруулсан бөгөөд заримаас дурдвал, чөлөөт бөхийн төрөлд өрсөлдөгчөөсөө 10 оноо илүү авсан, харин сонгомол бөхийн төрөлд найман оноо илүү авсан техникийн давуу ялалт байгуулсанд тооцно. Чөлөөт бөхийн төрөлд бүх төрлийн шидэлтэд 4, сонгомол барилдаанд 4 оноо, онцгой, уран гоё шидэлтэд 5 оноо өгч байх, гурван онооны хоёр шидэлт хийх, эсвэл таван онооны шидэлт хийвэл барилдааныг шууд дуусгаж байхаар шинэчилсэн дүрэмд тусгажээ. Түүнчлэн хэвтээ барилдаанд нуман тулгуурт оруулж, таван секунд дарахад нэг оноо өгч байхаар болсон байна.