Улсад 14 тэрбум төгрөгийн хохирол учруулсан “Хадгаламж” банкны ахлах нягтлан бодогч Ц.Чимэдцэрэнг одоо мөрийтэй тоглосон хэрэгт холбогдуулан шалгаж байгаа. Тэрбээр өмнө нь учруулсан их хэмжээний хохирлоо барагдуулаагүй хэрнээ ийнхүү мөрийтэй тоглоом тоглож яваа нь олон хүнд “Ц.Чимэдцэрэн ямар мөнгөөр ийнхүү мөрийтэй тоглож байна вэ” гэсэн хардлагыг төрүүлж байгаа ажээ. Ямартай ч “Их хэмжээний мөнгийг казино тоглоод алдчихсан. Би ганцаараа буруутай” гэж хуулийнханд мэдүүлж байсан энэ эрхэм өнөөдөр мөрийтэй тоглоомын газраар хэсэж яваа нь энэ юм. Таван жил гаруйн хугацаанд хоригдсон түүнд мөрийтэй тоглоом тоглох, дур зоргоороо цацах хэмжээний мөнгөтэй бий гэж үү. Түүний энэ мөнгийг хэн санхүүжүүлэв гэдэг нь сэжигтэй. Гэмт хэрэгт хамт оролцож, улсын мөнгийг үрэн таран хийсэн түүнийг өмнө нь мөрийтэй тоглосон хамсаатнууд нь ганцаараа хэргээ дааж гарсан гээд санхүүжүүлэв үү гэсэн хардлага ч байна.

Ц.Чимэдцэрэн 14 тэрбум төгрөгийн хэрэгт холбогдон шал­гагдахдаа 10 хүний хамт яллаг­дагчаар татагдаж байсан. “Хад­галамж” банкны захирал асан Г.Цэ­рэн­пүрэв, гүйцэтгэх захир­лаар ажиллаж байсан Ц.Базар, тус банкны газрын дарга Ц.Батболд, Ө.Эрдэнэхүү, “Хадгаламж” банкны нягт¬лан бодогч Б.Энхтуяа,  “Алтай констракшн” компанийн захирал Х.Бат-Эрдэнэ, “Асестес” компанийн захирал Я.Цогтбаяр, ажилтан Г.Хүрэлтогоо, Д.Баа­санхүү нарын нийт 11 хүнийг эрүүгийн хэрэгт татан шалгасан ч “аавынд” очсон нь Ц.Чимэдцэрэн,  нягтлан бодогч Б.Энхтуяа нар л юм. Тэднээс бусад нь шийтгэл амсаагүй хоцорсон. Эдгээр хүмүүсээс гадна түүний ард нөлөө бүхий улстөрчид байсныг тухайн үед хэвлэлүүд гарган тавьж байлаа. Тухайлбал, МАН-ын Ерөнхий нарийн бичгийн даргаар ажиллаж байсан У.Хүрэлсүх энэ хэрэгт холбогдсон ч сугарч үлдсэн. Тухайн үед УИХ-ын гишүүнээр ажиллаж байсан У.Хүрэлсүх 11.6 сая төгрөгөөр фургон автомашин авахдаа “Хадгаламж” банкны ахлах нягтлан бодогчоор ажиллаж байсан Ц.Чимэдцэрэнгээс авсан нь түүнийг энэ хэрэгт холбогдуу­лан яллагдагчаар татагдахад хүр­гэсэн юм. У.Хүрэлсүхээс гадна Г.Занданшатар, Т.Бадамжунай, Ж.Мөнхбат нарыг “Хадгаламж” банкны мөнгөөр БНСУ-д ка­зинод тоглосон гэж шалгахаар тухайн үедээ байсан ч тэгсхий­гээд намжсан. Ц.Чимэдцэрэн­гийн ард “Хадгаламж” банкны удирдлагуудаас гадна МАН-ын нөлөө бүхий улстөрчид байсан гэсэн үг.

Тэрбээр саяхан хэвлэлд ярилц­лага өгөхдөө “Сингапур явж мэс засалд орсон. Дахиад ч явж эмчилгээ хийлгэх шаардлагатай байгаа” хэмээжээ. Улсад учруулсан 14 тэрбум төгрөгөө дорвитой­хон төлж барагдуулаагүй хэрнээ гадаад явж эмчилгээ хийлгэх, мөрийтэй тоглох хэмжээний мөнгө түүнд байгаа бололтой. Өмнө нь Ц.Чимэдцэрэнгийн хө­рөнгийг шүүхээс хураах шийдвэр гарч Төрийн ордны хойд талд байрлалтай орон сууц болон хэд хэдэн үл хөдлөх хөрөнгийг нь хураан авч улсын орлого болгосон. Мөн түүний нэр дээр байсан бүх хөрөнгийг хураан авсан. Ц.Чимэдцэрэнгийн албан ёсны эзэмшилд мөрийтэй тоглох хэмжээний хөрөнгө үлдэх үндэслэл байхгүй. Иймээс л Ц.Чимэдцэрэнг “хамсаатнууд” нь санхүүжүүлэв үү гэдэг хар төрж буй юм. Хориход байхад нь ч түүнийг хэн нэгэн “харж үзэж” байсныг эх сурвалжууд мэдээлж байлаа. Зүүн хараагийн чанга дэглэмтэй хорих ангид ял эдэлж байхад нь түүний талаар “Хорих ангийн хашааг засварлахад нэг тэрбум төгрөгийн хандив өгсөн” гэх яриа дэгдсэн. Мөн хорих ангийн номын санчаар ажиллаж байхдаа номын санг нь засварлаж өгсөн гэдгээ ч тэрбээр хэвлэлд өгсөн ярилцлагадаа дурьджээ. Түүнчлэн түүнийг Зүүнхараагийн чанга дэглэмтэй хорих ангиас дэглэм бууруулсан нь хууль зөрсөн үйлдэл байсныг албаныхан мэдэгдэж байв.

ШШГЕГ-ын холбогдох хү­мүүс “Зүүнхараа дахь хорих ангийн хүмүүжигч Ц.Чимэдцэрэн ял эдлэх хугацаандаа  улсад учруулсан 14 тэрбум төгрөгөөс нэг ч төгрөгийн хохирол бараг­дуулаагүй байхад магадланд оруулж дэглэм бууруулсан зөрчилд нь тус ангийн удирдлага хурандаа н.Энхбатыг ажлаас нь чөлөөлөх хүртэл арга хэмжээ авсан” хэмээж байсан юм. Энэ бүх баримтаас үзэхэд Ц.Чимэдцэрэнг хоригдож байх хугацаанд нь хэн нэгэн эргэж тойрч, бүр дэглэм бууруулах хүртэл нь шүүхийн­хэнд нөлөөлж байсан гэсэн үг. Ин­гэж өөрөөсөө илүүтэйгээр түүнд мөнгө санхүүгийн дэмжлэг үзүүлэх эрхмүүд хэн байж болох вэ. Хэргийг нь үүрч, “дээлээ нөмөрсөн” найзыгаа намын залуус нь харж үзэв үү гэх хардлага төрж байна.