Олон улсын арбитрчид Монгол Улсын Зарим бүтээгдэхүүний үнийн өсөлтийн
албан татварын тухай хууль нь олон улсын эрх зүйд нийцсэн гэж үзжээ.
Тиймээс  “Алтан дорнод Монгол”, “Востокнефтьгаз” ХХК-ийн захирал, ОХУ-ын
иргэн С.В.Паушокын Монголын Засгийн газраас нэхэмжилсэн 1.5 тэрбум
ам.долларын нэхэмжлэлийг өнгөрсөн пүрэв гарагт хэрэгсэхгүй болгох
шийдвэр гаргасан байна. Арбитрчдын бүрэлдэхүүн “Сүүлийн жилүүдэд татвар
нэмэгдсэнд гайхах зүйлгүй. Монгол Улс нь уул уурхайн бараа,
бүтээгдэхүүнд ногдуулах татварыг нэмэгдүүлсэн цорын ганц орон биш” гэсэн
хариултыг В.С.Паушокт өгсөн байна.

Энэ талаар Хууль зүй, дотоод хэргийн яамны Бодлогын хэрэгжилт зохицуулалтын газрын дарга Т.Алтан­гэрэл ийнхүү ярьсан юм.

-Арбитрын шүүхийн зардалд манай талаас хэдэн төгрөг гаргасан бэ?

-Манай талаас энэ хэргийг шийдэхэд зориулж нийт зургаан тэрбум төгрөгийн
зардал гаргасан. Хэдийгээр багагүй мөнгө зарцуулсан боловч бид
чадахаараа хэмнэсний дүнд ийм хэмжээний мөнгө гаргасан гэж бодож байна.
Тухайлбал, айлын талаас найман өмгөөлөгч хөлсөлсөн байхад манай тал
дөрвөн өмгөөлөгчтэй шүүх хуралд оролцсон. Мөн гэрчүүдийн зардлыг хэмнэж,
Германы Франкфуртэд болсон шүүх хуралд эндээс гэрчүүдийг цахим
дэлгэцээр шүүгчидтэй уул­зуулж байсан жишээ бий.

-”Алтан дорнод Монгол” ХХК-аас авах ёстой татварын өрийг хэрхэн авах вэ?

-Үүнийг Монгол Улсын дотоод хууль журмаар шийдэх бололцоотой гэсэн
чиглэлийг арбитраас өгсөн. Энэ журмаар цаашид ажиллах болно. Манай улсад
“Алтан дорнод Монгол” ХХК татварын өртэйгөөс гадна  бид Ашигт малтмалын
тухай хуулийн дагуу хэд, хэдэн төлбөр нэхэмжилж байгаа.

-С.В.Паушокийн учруулсан өрийн хэмжээг тодорхойлсон уу. Түү­нийг дээрх өрийг төлөхгүй ор­гон зайлахгүй гэх баталгаа бий юу?

-“Алтан дорнод Монгол” болон түүний охин компаниуд манайд 120 гаруй
тэрбум төгрөгийн татварын өртэй байгаа. Үүнээс гадна байгаль орчны нөхөн
сэргээлт хийгээгүй. Үүний төлбөр тооцоо мөн гадаадын ажиллах хүчийг
ихээр оруулж ирсний төлбөрийг Ашигт малтмалын тухай хуулийн дагуу
төлүүлнэ. Энэ өрийг ганц Монголын төр авахгүй. Банкууд, аж ахуй нэгжүүд ч
авах ёстой. Тухайлбал, С.В.Паушок “Анод”, “Зоос” банкинд залилан
хийсэн, мөнгө угаасан хэргээр шалгагдаж байгаагаас гадна түүний компанид
ажиллаж байсан орон нутгийн иргэд цалингаа авч чадаагүй хохирсон. 
Засгийн газар болон Хууль зүй, дотоод хэргийн яамнаас энэ дөрвөн жилийн
хугацаанд энэ хохирлыг төлүүлэх үүднээс урьдчилсан хамгаалалт хийж
чадсан. Энэ нь юу вэ гэвэл, түүний эд хөрөнгө, лицензүүдийг битүүмжилж,
үрж зарах бололцоог нь хааж, цагдаагийн хамгаалалтад авсан. Тиймээс
хохирлыг бүрэн төлүүлэх бололцоотой гэж бодож байна.

Зохиогчийн эрх:
"Улс төрийн тойм" сонин