Юта Жазз баг 1-р сарын 31-нд Голден Стейт Варриорсыг талбай дээрээ хүлээн авах тоглолтон дээрээ дасгалжуулагч асан Жерри Слоаныхаа дугаарыг мөнхлөхөөр төлөвлөөд байна. Одоо 71 настай Жерри Слоан зөвхөн Юта Жаззыг багийг 1988 оноос 2011 он хүртэл буюу нийт 23 жилийн турш 1809 тоглолт удирдснаар НБА-д нэг багийг хамгийн удаан хугацаанд удирдсан дасгалжуулагч болсон. 1997, 1998 онуудад Карл Мелоне, Жон Стоктон гэсэн шилдэг хослолоор ахлуулсан Юта Жазз баг 2 жил дараалан НБА-н Финалд хүрч чадсан ч Жордан тэргүүтэй Чикаго Буллсыг хожиж чадалгүй Аваргын цомоос атгаад алдаж байсныг бид сайн мэднэ. Ингэснээр Жерри Слоан НБА-н аваргын цом хүртэж чадаагүй хамгийн шилдэг дасгалжуулагчийн нэгээр зүй ёсоор нэрлэгддэг. Жерри Слоан 2009 онд НБА-н Алдарын танхимд бичигдсэн. “НБА-н түүхэн дэх хамгийн агуу, хамгийн ихээр хүндлэгдсэн дасгалжуулагчийн нэг болох Жерри Слоаны дугаарыг мөнхлөх гэж буйг сонсоод үнэхээр их баярлаж байна. Жерри Слоан болон түүний энэ багийн төлөө хийсэн юутай ч харьцуулашгүй их хичээл зүтгэл, хувь нэмэрт хүндэтгэл үзүүлэх ёслол Юта Жаззын дэмжигчид хүрэлцэн ирж нэгдээрэй” гэж Стив Миллэр хэлжээ.

Юта Жазз Слоаны дугаарыг мөнхөлж буй анхны баг биш. Жерри Слоаны хувьд тоглогч байхдаа Чикаго Буллс багт 11 жилийг өнгөрүүлсэн. Энэ хугацаандаа 2 удаа бүх оддын тоглолтонд оролцож, Бүх хамгаалалтын 1-р багт 4 удаа, 2-р багт 2 удаа нэрлэгдэж 14 оноо, 7.5 самбар, 2.5 оновчтой дамжуулалт дунджилж байжээ. 1978 онд Чикаго Буллс Жерри Слоаны энэ багийн төлөө хийсэн хичээл зүтгэлийг үнэлж “4” дугаарыг мөнхөлсөн юм. Харин Юта Жазз Жерри Слоаны дугаарыг мөнхөлж буй 2 дахь баг болох юм.