“Hero Entertainment”-ийн бүтээсэн “Татар ажиллагаа” уран сайхны кино саяхан ОХУ-д зохион байгуулсан “Детективфест” олон улсын кино наадамд амжилттай оролцож, гуравдугаар байрт шалгарсан юм. Одоо уг кино Италийн кино наадамд өрсөлдөж байна. Боловсрол, соёл, шинжлэх ухааны дэд сайд Ч.Куланда өнөөдөр 14.00 цагаас “Татар ажиллагаа” киноны уран бүтээлчдэд уг киноны олон Улсын кино наадмаас хүртсэн дипломыг гардуулахаар болжээ.

“Татар ажиллагаа” инээдмийн уран сайхны киноны найруулагчаар Б.Баатар, продюсерээр “Номадс сүлжээ ресторан”-ы ерөнхий захирал М.Есөнмөнх, Эрхүү хотын “Аист” телевизийн ерөнхий захирал Амгалан Ренчинович Базархандаев нар ажиллажээ. Киноны гол дүрд Улсын драмын эрдмийн театрын жүжигчин, соёлын тэргүүний ажилтан Г.Эрдэнэбилэг, Э.Батхүү, Н.Отгонбат, “Номин талст” хамтлагийн ахлагч, дуучин Д.Батсүх, Оросын “Премьер Министр” хамтлагийн дуучин Б.Амархүү, ОХУ-ын нэрт жүжигчин Д.А.Певцов, жүжигчин Ч.Ундрал, кикбоксчин Ц.Амарбаясгалан, топ модель Э.Одгэрэл, бяцхан охин Б.Хулан нар тоглосон юм.

Зургийг ЭНД дарж үзнэ үү.