УИХ-ын эрхэм гишүүн, Эрүүл мэндийн сайд С.Ламбаагийн “жинхэнэ” нэрийг мэдэх хүн ховор байх. Ихэнх нь лам багш гэсэн утгатай төвд нэр болов уу гэж таамагладаг. Өөрөө ч нэгэнтээ тэгж хэлж байсан санагдана. Тэгвэл телевизийн хоолны нэвтрүүлэгт орохдоо тэрбээр каритай шөл, бяслаг, шинэ ногоотой зууш, гамбир хийж сайн тогооч гэдгээ харуулаад зоссонгүй нэрийнхээ нууцыг тайлав.

Түүний эхээс мэндэлмэгц авсан нэр нь Лампанов гэнэ. Том ах нь нийслэлд ирж төмөр замд ажилд ороод сүрхий “орос хэл”-тэй болсон гэнэ. Тэгээд хоёр дүүгээ төрмөгц нэр хайрлажээ. Нэгд нь Кинонов, нөгөөд нь Лампанов гэсэн алдар хүртээжээ. Эрхэм гишүүн ингэж Лампа буюу  чийдэн гэсэн нэртэй болсон байна. Хожим дунд сургуульд ороход нь Киноновыг Чулуунбаатар болгон өөрчилж Лампановыг арай “төвджүүлэн” Ламбаа болгосон гэнэ. Ингэж Лампанов Ламбаа болсон түүхтэй ажээ.