Хан-Уул дүүргийн цагдаагийн нэгдүгээр хэлтэст Хүнсний тухай хууль зөрчсөн хэргийг шалгаж байна. Тодруулбал, замын цагдаагийн албан хаагчид “Хюнда” маркийн авто машиныг зогсоон шалгахад гарал үүслийн гэрчилгээгүй гурван тонн үхрийн мах тээвэрлэн явж байжээ.

Энэ оны гуравдугаар сараас хэрэгжиж эхэлсэн Хүнсний тухай хуулинд хүнсний бүтээгдэхүүн үйлдвэрлэгч, худалдан борлуулагч, импортлогч, хэрэглэгчдийн эрх, үүргийг нарийн тусгасан байгаа. Тухайлбал, мах, сүү, ундны ус, буудай, гурилыг заавал төр захиргааны байгууллагаас зөвшөөрөл авч импортлох буюу экспортлох аж. Түүнчлэн дотоодод худалдан борлуулах явцад тухайн бүтээгдэхүүнийг хэрхэн бэлтгэсэн талаарх гарал үүслийн гэрчилгээтэй байх зайлшгүй шаардлагатай байгаа юм.