Тамхи ер нь хортой юу. Энэ асуултад Дэлхийн эрүүл мэн­дийн байгууллагаас илүү сайн хариулж чадах хүн нь УИХ-ын гишүүн Л.Эрдэнэчимэг. Хувь­даа эмийн үйлдвэртэйдээ бус, тамхинаас гаргах наалт зардаг энэ тэртэй нь ч огт холбоогүй. Зүгээр л Тамхины хяналтын тухай хуулийг УИХ-аар бат­луулж чадсан хүн бол гишүүн Л.Эрдэнэчимэг. Энэ төслийн ажлын хэсгийг ахалж байгаад л засгаас өргөн барьсан төслийг хууль болтол нь гүйсэн хүн бол яах аргагүй тэр.

Энэ агуулгаар нь бодсон ч, УИХ-д хийж байсан тайлба­руу­дыг нь санасан ч Л.Эрдэнэ­чи­мэг гишүүн “Тамхи ер нь хортой юу” гэсэн асуултад хамгийн сайн хариулна. Тэр тусмаа там­хичин хүн яаж эрүүл мэндээ­рээ хохирч байгааг, дам тамхи­далт буюу бусдын татсан там­хины утаа түүнээс илүү хор ур­шигтайг Л.Эрдэнэчимэг л бусад 75 гишүүндээ ойлгуулсан. Хам­гийн харамсалтай нь, батлуу­лаад жил ч болоогүй хуулийнхаа эсрэг  Л.Эрдэнэчимэг гишүүн ярьж яваад л учир байна.

Эрхэм гишүүн Тамхины хяналтын тухай хуулиа эрс эсэргүүцсэн талаар энд өгүү­лэх гэсэнгүй. Угаасаа тэр тэгээ­гүй. Харин батлуулсан хуулийн­хаа үзэл санаанаас өөрийг яриад яваад л учир байна. Там­хи татсандаа бус, ердөө л бусдын татсан тамхины утаанд хүмүүс яаж хорддог талаар Л.Эрдэнэчимэг гишүүн цагтаа ярьж явлаа. Харин уржигдар Байгаль орчин, хүнс хөдөө аж ахуйн байнгын хорооны хурал­даан дээр түүхий нүүрс шатаа­сан зуухны яндангаас гарч байгаа утаа тамхины утаа­наас хоргүй гэх утгагүй үгийг тэрээр хэлчихэв. Хэдийгээр Л.Эрдэнэ­чимэг гишүүний утааг хортой, хоргүйгээр нь ангилсныг УИХ-ын бусад гишүүн инээд наргиан болгоод өнгөрсөн ч үнэндээ хувь улстөрчийнх цаад төрх нийгэмд ил болов. Засагтаа тал засах гэж л тэрээр амны алдаа гаргасан байж ч болох юм.

Түүнийхээр бол түүхий нүүрс шатаасан зуухны яндан­гаас гарч байгаа утаа ганц л тохиолдолд “хоргүй” болж бай­гаа аж. Тэр нь юу гэхээр Л.Эрдэ­нэчимэг ги­шүүн УИХ-ын Агаа­рын бохирд­лыг бууруулах дэд хорооны дарга байгаа учраас яндангийн зарим утаа заавал хоргүй байх ёстой бололтой. Өөрөөр хэл­бэл, тэрээр хариу­цаж байгаа ажлыг нь УИХ дүг­нэх болохоор утааг хүртэл “Хор­той, хоргүй” хэмээн ялга­лаа. Ер нь яаж ч бодсон түүхий нүүрс шатаасан яндангаас гарч байгаа  утаа хоргүй байна гэж байх уу. Үнэ­хээр хоргүй бол там­хины утаа ч хоргүй болох биз. Хэрвээ там­хины утаа хор­гүй бол Тамхины хяналтын ту­хай хуулийн хэрэг гэж байна уу.

За энэ олон асуулт яахав. Хотын агаарын бохирдол, утааны хэмжээ өсөх тусам Л.Эрдэнэчимэг гишүүн эсрэ­гээр “утаа хоргүй” гээд хэлээд явж чадах нь л тодорхой боллоо. Яагаад гэвэл, түүнд энэ ажлыг хариуцуулсан. Хариуц­сан ажлаа үр дүнтэй хараг­дуу­ла­хын тулд яндангийн утааг хүртэл “Хоргүй” гэж хэлж чадаж байна шүү дээ. Яг л өнгөрсөн жил утаанд зарцуулсан улсын төсвийн мөнгийг үр дүнтэй харагдуулах гэж зарим улстөрч “Манай гудамжинд утаа багассан” гэж PR-дуулж байсан шиг юм боллоо доо.