УИХ-ын чуулганы хуралдаанаар УИХ-ын Ж.Батзандангийн санаачилсан Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуульд нэмэлт оруулах тухай хуулийн төсөл Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуульд нэмэлт оруулах тухай хуулийн төслийг хэлэлцэж буй. Энэ үеэр УИХ-ын гишүүдийн асуулт, саналаа илэрхийлсэн юм.

Тухайлбал, хуульд тусгасан “Төрийн өндөр албан тушаалтан гадаад эхнэр, нөхөртэй бол Үндэсний аюулгүй байдлын зөвлөлд хандана” гэсэн заалт чуулганы танхимд багагүй маргаан дагуулав. Сүүлийн үед “бенз” нэр зүүгээд буй Л.Эрдэнэчимэг гишүүн гэхэд л “Улстөрчдийг эхнэрээ сольдог” хэмээн буруутгав.

“Төрийн өндөр албан тушаалтан гэвэл УИХ дотроос л гарах байх. Эрэгтэй хүмүүс л эхнэрээ солих байх. Та нар амархан сольчихдог биз дээ” хэмээн ангийн хөвгүүддээ учирласан нь чуулганы танхимд бяцхан инээд бэлэглэв. Л.Эрдэнэчимэг гишүүн эрчүүдийг эвгүйцүүлсэн эл тайлбарынхаа араас УИХ-ын гишүүн Ж.Батзанданд хандан, өргөн барьсан хуулийнхаа Төрийн өндөр албан тушаалтан гадаад эхнэр, нөхөртэй бол Үндэсний аюулгүй байдлын зөвлөлд хандана” гэсэн заалтаа эргүүлэн татахыг хүссэн юм.