Эрүүл мэндийн яамны Төрийн нарийн бичгийн дарга асан Н.Түмэндэмбэрэлийг албан тушаалаа ашиглан тендерийн мөнгийг хувьдаа завшсан хэрэгт сэжигтнээр татан Авлигатай тэмцэх газарт/АТГ/-т шалгаж байгаа. Хэргийн талаар эх сурвалжаас тодруулахад “Хэргийн мөрдөн байцаалт дуусч, прокурорын газарт хянуулахаар шилжүүлсэн. Харин прокурор хавтаст хэргийг хянаж мөрдөн байцаалтын хугацааг ирэх арванхоёрдугаар сарын 2-ныг хүртэл сунгасан” гэж мэдээллээ.

Эрүүл мэндийн яамны Төрийн нарийн бичгийн дарга асан Н.Түмэндэмбэрэл, тус  яамны Оношилгоо, эмчилгээний, технологийн хэлтсийн дарга Д.Гончигсүрэн, хэлтсийн мэргэжилтэн П.Отгонжаргал, Гэмтэл согог судлалын Дүрс оношилгооны тасгийн эрхлэгч С.Батзориг нарыг Улсын мөрдөн байцаах газарт шалгаж эхэлсэн. Мөрдөн байцаалтын явцад албан тушаалын шинжтэй үйлдлүүд тогтоогдсон учир харьяаллыг өөрчилж, АТГ-т шилжүүлээд байгаа юм. Мөн мөрдөн байцаалтын шатанд тендерийн мөнгийг 2012 оны гуравдугаар сарын 30-ны өдөр Сангийн яамнаас Н.Түмэндэмбэрэлийн эзэмшлийн “Лабтех” компанийн данс руу нэг тэрбум 735 сая төгрөгийг MRI соронзон оношлогооны аппарат Шастиний нэрэмжит III эмнэлэгт нийлүүлэхэд зориулан шилжүүлсэн. Шилжүүлж авсныхаа дараа “Саммитмедикал сервис” компанийн данс руу нэг тэрбум 720 саяыг нь шилжүүлж,  тендерийн ажлыг гүйцэтгүүлсэн нь тогтоогдоод байгаа юм.