Пакистаны Засгийн газраас Дээд шүүхэд хандан экс Ерөнхийлөгч Первез Мушарафт эх орноосоо урвасан хэрэг тулгахыг хүсчээ. Пакистаны эрх баригчдын зүгээс түүнийг 2007 онд орон даяар онц байдал зарлахын тулд үндсэн хуулийг түдгэлзүүлснийг буруутган эх орноосоо урвасан гэж үзэж байгаа аж. Энэ 2013 оны эхээр Пакистанд эргэн ирсэн Первез Мушарафт шүүхээс эх орноосоо урвасан хэрэгт ял тулгаж, буруутайг нь тогтоовол тэрээр цаазаар авахуулах юм уу, бүх насаараа шоронд хорих ял сонсох гэнэ.

Үүнээс өмнө өнгөрсөн зургаадугаар сард Пакистаны Засгийн газраас экс Ерөнхийлөгч Первез Мушарафыг эх орноосоо урвасан хэрэгт буруутай хэмээн мэдэгдэж байжээ. Харин Засгийн газраас ийнхүү Дээд шүүхэд хандах болсон нь Мушараф шоронгоос суллагдан, гэрийн хорионд орсонтой холбоотой аж.

Первез Мушараф хэдийнэ Исламабад хотын Улаан сүмээс зэвсэгт дайчдыг зайлуулах 2007 оны цэргийн ажиллагааны үеэр 100 гаруй хүн амь үрэгдсэн хэрэг болон экс Ерөнхий сайд Беназир Бутто, босогчдын толгойлогч Наваб Акбар Бугти нарын захиалгат аллагад буруутгагдаад байгаа юм.

Первез Мушараф нь 1999 онд цуст цэргийн эргэлтээр Ерөнхий сайд Наваз Шарифыг суудлаас нь буулгасны дараа Пакистаны Төрийн эрхийг барьж байсан аж.