Даваа гаригт цэрэг, танк оруулсан Сирийн Дераа хотод амь үрэгдсэн жагсагчдын тоо 35 хүрч, 500 орчим хүн баригджээ. Орон нутгийн Савасия (Sawasiah) гэх хүний эрхийн байгууллага энэ тухай мэдээллээ гэж The Guardian бичжээ.  Хүний эрхийн төлөө тэмцэгчийн хэлснээр Сирийн эсэргүүцлийн нэг сарын дотор багаар бодоход 400 хүн амиа алдсан байна. Тэдний 150 орчим жагсагч зөвхөн өнгөрсөн амралтын өдрүүдэд алагдав.

Сирийн эрх баригчдыг олон улсын хамтын нийгэмлэг буруушаав. Гал зог­соох­ыг мягмар гаригт Башар Ассадаас Франц, Италийн лидерүүд шаардлаа. Сирийн эсрэг хориг арга хэмжээ авах санаачлагыг Франц Европын хол­боонд гаргаж магадгүй. Түүнд нь Их Британи нэгдэж болзошгүй.

Сирийн эрх баригчдыг эсрэг НҮБ-ын Ерөнхий нарийн бичгийн дарга Бан Ги Мун үгээ хэлж,  тус улсад болж байгаа хэрэг явдалд бие даасан мөрдөн байцаалт явуулахыг уриалсан юм. Сирийн байнгын төлөөлөгч Башар Жаафари (Bashar Ja’afari) хариуд нь өөрийн улсыг ямар ч мөрдөн байцаалт явуулж чадна, гаднын тусламжгүйгээр болно гэж мэдэгдсэн байлаа. Бүгд шүүмжилсэн ч НҮБ-ын Аюулгүйн зөвлөл Сирийг буруутгасан тогтоол гаргаж чадсангүй. Оросын байр суурь түүнд нь саад болсон байна.