Масаши Кишимото гэх хэний ч хараанд өртөхөөргүй япон залууг “Наруто” манга (комик) цуврал нь Японд төдийгүй дэлхий дахинаа алдаршуулсан юм. Өнөөг хүртэлх бүх манга бүтээлүүдээс хамгийн олон хувь хэвлэгдсэн “Наруто”-г дэлхийн өнцөг булан бүрт сая сая хүн үздэг аж. Долоо хоногт нэг шинэ анги гардаг анимэг (хүүхэлдэйн кино) үзэгчдийн дийлэнх нь өсвөр насныхан. Тэр бүү хэл насанд хүрсэн эрчүүд хүртэл “Наруто”-гийн цувралыг алгасалгүй үздэг, шинэ ангийг нь тэсэн ядан хүлээдэг аж.
“Наруто”-гийн зохиолч Масаши Кишимото бага ангид байхдаа ганц сатаардаг зүйл нь тухайн үед Японд алдартай байсан “Doraemon” телевизийн шоу байжээ. “Doraemon”-ий нөлөө их байснаас тухайн үеийн япон хүүхдүүд шоуны баатруудыг дуурайлган зурах дуртай байж. Түүний бүх найз уг шоунд “орчихсон” байв. Бүгдийг нэг бүрчлэн нямбай хийдэг Масаши зурахдаа сайн байсан тул найзууддаа яаж адилхан дуурайлгаж зурахыг заадаг байв. Тэр үеэс Масаши зурах дуртай болж, нуугдаж тоглохдоо ч хүртэл зураг зурж суудаг болжээ. Акира Торияамагийн алдартай бүтээл “Доктор Сламп”-ийг үзэх хүртлээ Масаши нэг хэсэгтээ л “Mobile Suit Gundam”-аас салж чадаагүй аж. “Доктор Сламп” түүний хувьд жинхэнэ супер шоу байсан бөгөөд баатруудыг нь зурж эхэлжээ.
Түүнийг бага сургуулиа төгсөх үед гарсан Акира Торияамагийн өөр нэг алдартай бүтээл “Луугийн бөмбөг” Масашигийн оюун ухааныг бүрэн эзэмдэж, түүнийг манга буюу комикт “оруулсан” юм. Түүнээс хойш Масаши болон түүний ихэр Сэйши өөрсдийн анимэ баатартай болохыг мөрөөдөх болсон гэдэг. (Масашигийн ихэр Сейши мөн манга зохиогч бөгөөд хамгийн алдартай бүтээл нь 666 Сатан юм)
Японы анимэ мастер Акира Торияама түүнд хамгийн их нөлөөлсөн гэдэг. Хожим Масаши түүнийг өөрийнх нь бурхан байсан хэмээн дурссан байдаг юм. Тэр үед Масашигийн ганц дуртай зүйл нь “Луугийн бөмбөг”-ийн баатруудыг дуурайлгаж зурах байв. Эцэг эх нь түүнийг 190 иенээр видео тоглоом худалдаж авахыг хэзээ ч зөвшөөрөхгүй байсан тул Масаши найзынхаа тоглоомыг гуйдаг байв.
Тэр үед Масаши Акира Торияама шиг манга зохиолч болохоор шийдсэн байв.
Түүний энэ шийдвэрт мангагийн хорхойтнууд үргэлж талархаж явдаг. Түүний анхны манга бүтээл нь “Hiatari-kun” буюу “Сүүдрийн нинжа” нэртэй байв.
Акира Торияамагийн анимэ баатруудын дүрслэлийг Масаши бүр бага ангид байхдаа л биширдэг байжээ. Гэвч тухайн үед ангийнх нь бүх хүүхдэд байдаг байсан “Нинтендо” видео тоглоом Масашид байгаагүй юм. Эцэг нь видео тоглоом гэдэг үг л сонсвол “Явж хичээлээ хий” гэдэг байв. Масаши эцгээ залхтал нь гуйж байж Акира Торияамагийн “Луугийн эрэлд” хэмээх тоглоом авахуулсан нь түүний анхны видео тоглоом байв. Гэвч ахлах сургуульд бэйсбол Масашигийн амьдралын салшгүй хэсэг болж зургаа бараг мартаж эхэлж байв. Үнэндээ хичээл, спортын бэлтгэлийн хажуугаар зураг зурах цаг түүнд гарахаа больжээ. Масаши ч комик баатруудыг зурах нь жаахан хүүхдийн тоглоом гэж бодох болсон байв.
Харин нэгэн удаа Кацухиро Оотомогийн “Акира” хэмээх алдартай хүүхэлдэйн киноны зурагт хуудсыг гудамжинд олж харснаас хойш Масаши түүн шиг зураач болох дийлдэшгүй хүсэлд автаж зургаа өдөр болгон зурах болжээ. Кацухирогийн зураг түүний ертөнцийг бүрмөсөн өөрчилсөн билээ. Масаши Кацухирогийн стилийг ойлгохын тулд олон сарын судалгаа хүртэл хийж үзжээ. Гэвч ойлгож чадсангүй. Харин олж мэдсэн зүйл нь түүнийг гайхашруулсан. Бүтээл бүхэн яг л хүний ДНК шиг давтагдашгүй, дуурайж болохгүйг тэр ойлгосон аж. Масаши хэдийгээр Оотомо, Торияамагийн зурагнуудын гайхамшиг нь юунд байгааг ойлгож чадаагүй ч эффект, дизайн, жижиг деталуудаар бусдаас ялгардгийг олж харсан юм.
Масаши тэгэхэд уран бүтээл давтагдашгүй ганцхан байдаг, харин бусдыг дуурайж, хуулбарлах нь ямар ч утгагүй гэдгийг ухаарчээ. Тэр өдрийг хүртэл Масаши ямар нэг байдлаар бусдын бүтээлээс санаа авч, дуурайлгаж зурдаг байснаа анзаараагүй юм. Масаши зураг зурах өөрийн гэсэн арга барил олж авахаар уйгагүй хичээсэн ч энэ тийм амар байсангүй. Түүнд энэ нь боломжгүй мэт санагдаж байжээ. Уран бүтээлч болгоны арга барил давтагдашгүй гэдэг итгэл үнэмшил түүнийг өөрийн арга барилаар зураг зурахад сургасан юм. 11-р анги төгсөх жилээ Масаши анхныхаа 31 хуудас манга (комик)-г бүтээв.
Манга бүтээл нь сайн болсон эсэхийг мэдэхгүй байсан тул ихэр Сейшид үзүүлжээ. “Гоё биш гэж үү?” гэхэд Сейши “Муухай болж!!” гэж унтрааж орхисон ч Масаши түүний үгийг чихнийхээ хажуугаар өнгөрөөжээ. Ааваасаа асуухад мөн л адилхан зүйл хэлсэн боловч Масаши анхны бүтээлээ нэгэн сэтгүүлийн уралдаанд явуулсан юм. Харин уралдаанд ялж чадаагүй түүний бүх баяр хөөр нь алга болж комикоо шүүгээндээ хийгээд мартаж орхижээ. Гэвч Масаши комик зохиогч болох мөрөөдлөө орхисонгүй. Комик зохиолын уралдаанд ялахын тулд сайн зурах ёстой гэж өөртөө хэлжээ. Түүний дараа хэд хэдэн комик зохиосон боловч аль нь ч сайн болсонгүй. Масаши бусдынх яагаад сайн, өөрийнх нь муу байгааг өөрөөсөө асуудаг байв. Энэ үед Масаши ахлах сургуулиа төгсч, ангидаа 39 сурагчийн сүүлээсээ хоёрдугаарт бичигдэв. Комикоо сайн зурж чадахгүй, хичээлээ ч олигтой сураагүй Масаши коллежид элсч чадахгүй нь бүгдэд тодорхой байсан юм. Масаши комик зургаа ч орхилгүй хамгийн алдартай комик зохиогч болох мөрөөдлөө биелүүлсэн юм. Масаши Кишимотод амжилт авчирсан “Наруто” комик зөвхөн Японд л гэхэд 126.5 сая ширхэг худалдаалагджээ. Уг цуврал 1999 онд анх хэвлэгдсэн цагаас хойш албан ёсны эрхтэйгээр дөрвөн анимэ, 30 гаруй видео тоглоом болон гарчээ. Өсвөр насныхнаас авахуулаад эрийн цээнд хүрсэн эрчүүд хүртэл “орчихдог” “Наруто”-гийн шүтэн бишрэгчид дэлхийн өнцөг булан бүрт бий. Алдартай одууд Холливудын жүжигчин Жонни Депп, дуучин Робби Вильямс, Холливудын нэрт найруулагч Квинтин Тарантино, сагсан бөмбөгийн од Коби Брайнт нар ч бас Нарутогийн шүтэн бишрэгчид аж. Нарутогийн шүтэн бишрэгчдийн дийлэнх нь өсвөр насны хүүхдүүд. Гэвч уран зөгнөл, хийсвэр дүрслэлүүд нь маш хүчтэй “Наруто”-д донтсон хүүхэд бодит байдал, хийсвэр дүрслэл хоёрыг ялгаж салгахаа больсон тохиолдол гарч байв. 2012 онд ОХУ-д дуртай хүүхэлдэйн киноноосоо хамааралтай болсон 14 настай хүү амиа хорлосон тохиолдол гарч байв. Хүүгийн золгүй үхлийн дараа эцэг эх нь түүнийг, “Наруто”-г байнга үздэг байсан хэмээн ярьсан юм.“Наруто”-гийн гол баатруудын нэг Итачигийн үхэл хүүд том цохилт болсон байжээ.
Комик зохиолууд ялангуяа “Наруто” Японы поп соёлын салшгүй хэсэг болсон бөгөөд “Наруто” болон түүний баатруудын адилаар хувцаслаж, үс зүсээ янзлуулдаг нь Японы залуус, өсвөр насныханы дунд түгээмэл аж. “Наруто”-гийн шүтэн бишрэгчдийн хамгийн их асуудаг асуулт нь зөгнөл хэрхэн дуусах бол гэдэг юм. Гэвч “Наруто”-гоос уйдах боломжгүй юм.
Н.ЭНХТУЯА
Эх сурвалж: "NEWS WEEK" сонин №032
Холбоотой мэдээ