Автобусны буудал бараадсан ТҮЦ буюу Түргэн үйлчилгээний цэгүүдийг албадан буулгах захирамжийг хотын дарга Э.Бат-Үүл өнгөрсөн гуравдугаар сард гаргасан ч хэрэгжүүлэх ажил нь назгайрсан хэвээр байна.

Мэргэжлийн хяналтын газар, Чингэлтэй дүүргийн Өмч харилцааны газар хамтран өнгөрсөн долоо хоногт Чингэлтэй дүүргийн нутаг дэвсгэрт орших ТҮЦ, хүнсний павильонуудыг албадан буулгасан ч зарим нэг нь сугарч үлджээ. Аз нь түшээд үү, аль эсвэл арын хаалга хэрэглээд ТҮЦ-ээ буулгуулалгүй авч үлдэв үү, Чингэлтэй дүүргийн ЗДТГ-аас холгүйхэн /зүүн талд нь/ хоёр ч ТҮЦ худалдаа эрхэлсэн хэвээр байна. Тодруулбал, нэг ТҮЦ нь “Хаан” банкны Чингэлтэй дүүрэг дэх салбарын хойд талд, нөгөө нь “Зоос гоёл” компанийн хажуухан талд ТҮРГЭН үйлчилгээгээ эрхэлсээр байна. Эзэд нь арын хаалга ашиглаад авч үлдээгүй л юм бол эдгээр ТҮЦ-ийг яаралтай буулгаж, хотын даргын захирамжийг биелүүлэхийг Чингэлтэй дүүргийн Өмчийн харилцааны газрынханд сануулъя. Хотын даргын захирамжийг хоёр нүүр гаргаж хэрэгжүүлж болохгүй л байх. Гэр хороололд орших ТҮЦ-үүдийг буулгаж чадсан хойно хотын төвийнхийг нь ч бас яагаад буулгаж болохгүй гэж…

Үнэхээр л орчин үеийн шаардлага хангасан хүнсний дэлгүүрүүдээр худалдаа хийхийг зорьж байгаа юм бол алагчлалгүй адилхан буулгах ёстой биз дээ.