Өнгөрсөн зунаас эхэл­сэн экспортын хомсдол, ам.дол­ларын ханшийн өсөлтөөс болж эдийн засгаа элгээр нь хэвтүүлэхдээ тулаад байсан Засгийн газарт амсхийх боломж олдлоо. Харамч айлын хаяа муутай эхнэр шиг араншинтай Монголын төр, хаврын тэнгэр шиг хувирч өөрчлөгдөж байдаг хууль эрх зүйн орчноос болж хөшгөө татчихаад байсан хөрөнгө оруулагчид Монгол руу харцаа эргүүлэх нэг ч гэсэн шалтгааны “үр”-ийг  тарив. Энэ бол намрын чуулганы эхэнд батлагдсан Хөрөнгө оруулалтын тухай хууль болон Хөрөнгө оруулалтын сангийн тухай хууль. Засгийн газар бүр оны эхнээс төсөл нь боловсрогдож эхэлсэн эдгээр хуулиудыг намрын чуулганаас урьтаж батлуу­лахаар өнгөрсөн есдүгээр сард УИХ-ын ээлжит бус чуулганыг зарлуулсан ч намын бүлгүүдийн санал зөрөлдөөнөөс болж товлосон хуга­цаандаа багтаагүй. Харин өнгөрөгч долоо хоногт эхэлсэн ээлжит бус чуулган уг хуудиудыг гурав хоногийн дотор хэлэлцэж баталснаас үзвэл гишүүдийн чих нэлээд зөөлөрсөн бололтой. Энэ нь Засгийн газар сайн ажиллалаа гэхээсээ илүүтэй эдийн засгийн бодит нөхцөл ингэж шахсаных биз.

Хөрөнгө оруулалтын тухай хуулийн гол зохи­цуулалт нь төсвийн орлогод хамгийн их жин дардаг /төсвийн орлогын 80 хувь, татварын нийт дүнгийн 53 хувь/ аж ахуйн нэгжийн орлогын албан татвар, нэмүү өртгийн албан татвар, гаалийн татвар болоод нөөц ашигласны төлбөрийг одоо байгаа хэмжээнд нь тогтворжуулахаар болсон явдал. УИХ татварын хувь хэмжээг нэмэгдүүлсэн ч тогтворжуулалтын гэрчилгээ авсан аж ахуйн нэгжүүдэд энэ хамаарахгүй, харин тат­варын хувь хэмжээ буурсан тохиолдолд тэр хэмжээгээр нь татвараа төлнө гэсэн үг. Хуулийн анхны төсөлд 15 тэрбумаас дээш хөрөнгө оруулалт хийсэн аж ахуйн нэгжүүдэд аль салбарт хөрөнгө оруулснаас үл хамаа­ран тогтворжуулалтын гэр­чилгээ олгохоор тусгасан байс­ныг хэлэлцүүлгийн явцад хөрөнгө оруулсан бүс нутаг болон үйлд­вэр­­лэлийн салбараас нь хамаарч хөрөнгө оруулалтын босгыг нэмэг­дүүлж, бас бууруулсан байгаа.

Тухайлбал, Улаанбаатарт 10-30 тэрбум төгрөгийн хөрөнгө оруулалт хийсэн, мөн баруун бүс буюу Баян-Өлгий, Говь-Алтай, Завхан, Увс, Ховд аймгуудад 2-8 тэрбум төгрөгийн хөрөнгө оруулсан бол татварын тогтворжуулалтын хугацааг таван жилээр, Улаанбаатарт 200 тэрбумаас дээш, баруун бүсэд 50 тэрбумаас дээш төгрөгийн хөрөнгө оруулсан бол тогтворжуулалтын хугацаа 15 жил байхаар хууль­­чилсан. Татварын тог­т­вор­жуулалтын хугацаа болон хөрөнгө оруулалтын хэмжээг таван бүсэд ялгавартайгаар тогтоосон нь жаахан төвөгтэй мэт харагдавч нийтэд нь 15 тэрбум төгрөгийн босго тавьсантай харьцуулахад илүү олон компани тат­варын тогтворжуулалтад хамраг­дахаар болж байна.

Хөрөнгө оруулалтын хуультай хамт батлагдсан бас нэг чухал хууль нь Хөрөнгө оруулалтын сан­гийн тухай хууль. Энэ хууль хэрэгж­сэнээр иргэдийн гар дээр байгаа, эргэлтэд ордог­гүй илүүдэл хөрөнгийг Хөрөнгө оруулалтын санд төвлөрүүлж, санхүүжилт шаард­лагатай байгаа салба­руудад хөрөнгө оруулах замаар нийт эдийн засгаа тэтгэх боломжтой. Ингэснээр хөрөнгө оруулалтын шинэ эх үүсвэрийг дайчлан гаргахаас гадна банкуудын хүү буурах, санхүүгийн зах зээл дээр өрсөлдөөн бий болох, иргэд ч гэсэн илүүдэл хөрөнгөө эргэлтэд оруулж ашиг олох гээд тал талдаа үр ашигтай. Намрын чуулганы эхэнд батлагд­сан хоёр хууль шинэ монголчуудын хувьд гадаадаас ч, дотоодоосоо ч хөрөнгө босгох, тэр хэрээр ажил, орлогоо нэмэгдүүлэх үүд хаалгыг нээлээ. Хэрэгжилт нь харин яаж явах нь энэ Засгийн газраас шалтгаална.