Зураач, барималч Д.Дорждэрэм настан буурал өвөөгийнхөө хөрөг баримлыг зураач ийн урлажээ. Үрчийсэн дух, унжсан хөх, өвдөж муруйсан өвдөг. Нүдээ анин бодлогошрох царай. Амьдрал туулсан, нас нь дөхсөн эр хүн уран бүтээлчийн нүдэнд тэнгэрт халих өдрөө хүлээн тэнхээ тасран зогсоо тэхтэй адил харагджээ. Хэдий сэтгэлд нэг л уйтай, санаа алдам ч бүтээл цаанаа л бүлээн. Жирийн үзэгчид ийм дотно санагдаж байгаа юм чинь ач хүүд нь өвөө нь ямар эрхэм, хайр дүүрэн байх билээ. Авьяас дүүрэн хүү нь өвөөгөө өөрийн дүрслэн урлах хамгийн шилдэг арга барилаар ийнхүү бүтээлдээ мөнхөлжээ.

Барималч гэргийгээ ийнхүү дүрслээд “Хайр ба байгаль” гэж нэрлэсэн байна. Хөл хүндтэй бүсгүй ялдам дөлгөөн. Хэвлий дэх үрээ хайраараа бүүвэйлэх түүний харцнаас л бүгдийг нь уншиж болохоор. Уран бүтээлч залуу хайртай эхнэрээ, эх хүнийг, эх байгалиа гэсэн хайрын сэтгэлээр энэхүү хөрөг баримлыг бүтээжээ гэхээр.

Хаанбанкинд байрлах МУЗ-ийн “Улаан гэр” галерейд нээгдсэн түүний “Огт оргүй” үзэсгэлэн ердөө долоон үзмэртэй. Амьдрал, хайр, байгалийн тухай тэрбээр хэрхэн өгүүлснийг очиж сонирхоорой. Зохион байгуулагч МУЗ-ийнхөн “Байгаль өөрөө хүчирхэг. Хүчирхэг болохоор туульслаг. Энэ бүхний тухай бодол “Огт+Оргүй” гэсэн үгтэй өөрийн эрхгүй намайг холбоно. Магадгүй бүхний учрыг тайлахаас илүү өөрийн сэтгэлгээн дэх хүчирхэг гоо сайхныг мэдрэх, бүтээх нь миний үүрэг” хэмээн түүний хэлсэн үгээр үзэсгэлэнгийн нээлтэд ирсэн зочдыг угтсан юм.