Иран улсыг чиглэсэн кибер халдлага, вирусын довтолгоо ар араасаа үргэлжилсээр байна. Хэсэг хугацааны өмнө Stuxnet нэртэй вирус тус улсын атомын реакторын хяналтын системд нэвтэрсэн бөгөөд мэргэжилтнүүд үүнийг Ираны цөмийн хөтөлбөрт ашиглаж байгаа багаж хэрэгсэлд хяналт тавих зорилгоор АНУ-аас илгээсэн вирус хэмээн дүгнэж байсан юм.
Харин саяхан Ираны мэргэжилтнүүд тус улсын засгийн газрын байгууллагуудад нэвтрүүлэх зорилгоор илгээсэн өөр нэг төрлийн вирусыг илрүүлжээ. Stars нэртэй уг вирус нь азаар програм хангамжинд хүчтэй гэмтэл учруулах хэмжээний чадваргүй байсан байна. Энэ удаагийн халдлага нь тус улсад он гарсаар болж буй хоёр дахь томоохон кибер халдлага болсон ба халдлагыг чухам ямар зорилгоор, хаанаас илгээснийг тогтооход тодорхой хугацаа шаардлагатай байна.