Зимбабвегийн Хванге үндэсний дархан цаазат газрын 81 заан хулгайн анчдын хэрэглэсэн цианидад хордож үхсэн болохыг албаныхан тодруулсан байна. Зэрлэг амьтан хамгаалах албаныхны мэдээлснээр хулгайн анчид зааныг агнаж, соёог нь авахын тулд Зимбабвегийн хамгийн том дархан цаазат газрын амьтдын ундны усны эх үүсвэрт цианид хийснээс заанаас гадна өөр олон төрлийн амьтан хордож үхсэн гэнэ. Одоогоор цианидад хордсоны улмаас хичнээн тооны өөр амьтан үхэж, хордсон нь тодорхойгүй байна. Цагдаа нар энэ хэргийг үйлдсэн байж болзошгүй есөн анчинг дархан цаазат газар бүгэж байхад нь баривчилжээ.