Нэгэн цагт Хятадын коммунист намын өндөр албан тушаал хашиж байсан, БНХАУ-ын Чунцин хотын коммунист намын хорооны дарга, Улс төрийн товчооны гишүүн асан Бо Силайг улсын мөнгө хувьдаа завшиж, их хэмжээний мөнгө шамшигдуулсан гэж үзэн бүх насаар нь шоронд хорихоор боллоо. Тэрээр шүүх хуралдааны явцад өөрийгөө буруугүй гэж хэд, хэдэн удаа мэдэгдэж байсан ч шүүх бүрэлдэхүүн түүнд ийн бүх насаар нь хорих ял оноолоо. Бо Силайн эхнэр өнгөрсөн жил Их Британийн бизнесмэн Нил Хейвүүдийн амь насыг хороосон хэрэгт холбогдож, өдгөө шоронд хоригдож байгаа билээ.

Бо Силайн хэргийг мөрдсөн мөрдлөгийн баримт, холбоотой мэдээллийн дүгнэлтүүдэд түүнийг өнгөрсөн 15 жилийн хугацаанд 20 сая юань хувьдаа завшсан гэж гарчээ. Гэхдээ хятад гаралтай цахим ертөнцийн идэвхтэй тэмцэгчдийн мэдээлэл бүгд Богийн талд байгаа юм. “Хятадын засаг төр авлигатай тэмцэж байгаа дүр эсгэхийн тулд түүнд зохиомол хэрэгт тулгалаа. Хятадын Засгийн газар, коммунист намын хянан шалгах хороо жил бүр том хэмжээний шалгалт явуулдаг. 15 жилийн хугацаанд ийм их хэмжээний мөнгө хувьдаа завших боломж байхгүй” хэмээн Вейбо цахим хуудасны нэгэн блогч өөрийн блогтоо тэмдэглэжээ. Одоо Хятадын коммунист намын хянан шалгах хороо тус намын 10 гаруй томоохон албан тушаалтнуудад нэгдсэн шалгалт хийж байгаа билээ.