Хятадад авилгын хэрэгт сэжиглэгдсэн төрийн өмчийн хөрөнгө оруулалтын фирмийн ерөнхий инженер Ю Ци-и гэгч байцаалтын явцад тамлал даалгүй нас барсан талаар мэдээлж байсан билээ. Тэгвэл түүний үхэлд Хятадын Коммунист намын дээд албан тушаалын зургаан эрхэм хариуцлага хүлээн шүүгдэхээр болсон байна. Тэдний тав нь Коммунист намын сахилга батын төв хорооны гишүүд, нэг нь орон нутгийн прокурорын ажилтан ба тэднийг шүүх хурал өнөөдөр болж байгаа аж. Синьхуа агентлагт мэдээлснээр прокуророос эдгээр зургаан хүнийг Ю Ци-ийн үхэлд буруутган, цаазаар авах ял төлөвлөөд байгаа гэнэ.

Хятадын төрийн өмчийн хөрөнгө оруулалтын “Wenzhou Industry Investment” фирмд ерөнхий инженерээр ажиллаж байсан 42 настай Ю Ци-и өнгөрсөн дөрөвдүгээр сард мөстэй хүйтэн усанд толгойг нь дүрж байцаах үеэр нас барсан билээ. Энэ хэрэг нь олон улсад Хятадын эрх барих намын сахилгын хорооны нэр хүндийг унагаасан томоохон дуулиан тариад байгаа юм.

Ю Ци-и нь Хятадын /shuanggui/ гэх хуулиас гадуур хорьж байцаах газарт нийтдээ 38 хоног хоригдсон байна. Түүнчлэн Хятадын топ улстөрч Бо Силай ч албан тушаалаа урвуулан ашигласан хэрэгт буруутгагдсанаасаа хойш 17 сар /shuanggui/-д хоригдсон аж.