Өнгөрөгч долоо хоногийн баасан гаригт Сангийн дэд сайд асан Ч.Ганхуяг нарын таван жиргээч Засгийн газар валютын ханшийг барьж чадахгүй байгааг шүүмжилж, Төрийн ордон руу салаавч гаргасан юм. Харин салаавч гаргасан хүмүүст цагдаагийн байгууллага эрүүгийн хэрэг үүсгэн шалгаагүй талаар Цагдаагийн ерөнхий газраас мэдээлж, зарим хэвлэлүүд ташаа мэдээлэл өгч байгааг дурьдлаа.

Уг мэдэгдэлд,

"Монгол Улсын "Жагсаал, цуглаан хийх журмын  тухай" хуулийн  есдүгээр зүйлийн 9.1-д " …жагсаал, цуглаан хийхдээ нутаг дэвсгэрийн засаг даргад мэдэгдэнэ" гэсэн заалтыг зөрчин цуглаан хийсэн Ч.Ганхуяг, Б.Болдсайхан нарыг Сүхбаатар дүүргийн цагдаагийн  хэлтсээс дуудаж уулзсан.  Жагсаал цуглаан хийх үед түүнд оролцогч нарыг гэмт халдлагаас хамгаалах болон хэв журам сахиулах үүргийг цагдаагийн байгууллага хуульд заасны дагуу хариуцдаг. Иймд аюулгүй байдлаа хангаж, хуулийн хүрээнд байхыг сануулсан. Түүнээс дээрх иргэдэд эрүүгийн хэрэг үүсгэн шалгасан асуудал байхгүй гэдгийг мэдэгдье" гэжээ.