2013 оны зуны хөлбөмбөгийн солилцоо наймааны цонх өнгөрсөн долоо хоногт хаагдлаа.

“Хүн зах” гэгддэг солилцоо, наймааны энэ зуны цонхоор хөлбөмбөгийн түүхэн дэх  хамгийн үнэтэй 10 солилцооны дөрөв нь болж, дэлхийн хамгийн үнэтэй зарагдсан хөлбөмбөгч тодорсон билээ.

Энэ зуны солилцооны хамгийн оргил нь Испанийн хоёр агуу түүхтэй багуудын хооронд өрнөнө гэж спортын сэтгүүлчид үзэж байсан нь биеллээ оллоо. Испанийн Каталон үндэстний “Барселона” Бразилийн залуу од Нэймарийг 57 сая еврогоор худалдаж авснаар мөнхийн өрсөлдөгч Кастилль үндэстний “Реал Мадрид” багийнхны “эгдүүг хүргэсэн” гэхэд болно. Кастилль үндэстнүүд Нэймараас ч хүчтэй залуу одыг төдийлөн удаан хайгаагүй. Английн “Премьер лиг”-ийн сүүлийн хоёр жилийн шилдэг залуу тоглогч, энэ жилийн шилдэг Их Британи хөлбөмбөгч Гарет Бэйлийг 100 сая еврогоор /88 сая фунт/ худалдан авлаа. Монгол төгрөгөөр бодох юм бол Гарет Бэйл 215 тэрбумын  үнэтэй. Ингэснээр Гарет Бэйл түүхэнд хамгийн өндөр үнээр зарагдсан хөлбөмбөгч болсон юм. Гарет Бэйл Испанийн “Реал Мадрид” багт түүнийг ирэхээс өмнө дэлхийн хамгийн үнэтэй хөлбөмбөгч гуншинг эзэмшиж байсан Португалийн од Криштиан Роналдутай хамтран тоглоно.

Энэ зуны хөлбөмбөгийн солилцоонд идэвхитэй оролцоно гэж таамаг дэвшүүлж байсан Английн “Арсенал” цонх хаагдах өдөртэй зэрэгцэн багийнхаа түүхэндээ анх удаа хагас зуун сая евро зарцууллаа. Зуны турш чимээгүй байсан “Арсенал” Германы шигшээ багийн хагас хамгаалагч Мэсүт Озелийг “Реал Мадрид”-аас 50 сая еврогоор худалдаж авснаар төвийн шугамаа хүчирхэгжүүлж чадсан юм.  

Одоогийн байдлаар энэ зуны хамгийн оновчтой наймаагаар Испанийн “Реал Мадрид” багт ирсэн Иског нэрлэж байна. Иско эзэн хааныхаа багт ирснээр хойш тоглолт бүр гялалзаж, гоол оруулж, оновчтой дамжуулалт, гоол оруулах боломжийг хамгийн ихээр гаргаж буй тоглогч юм. Иско удахгүй Испанийн эзэн хааны “Реал Мадрид” багийн 10 дугаартай талбайд тоглох биз ээ. Мөн Английн “Арсенал”-д ирсэн Месүт Озелийг хамгийн шилдэг наймаануудын нэг болно гэж үзэж байна. Месүт Озел шиг олон талт тоглолттой төвийн хагас хамгаалагч Английн “Премьер лиг”-т, “Арсенал” тоглолтод таарна.