Хобби бол хувь хүний салшгүй нэг хэсэг. Японы уламжлалт цаасаар урлах урлаг нь арван жилийн сургуулийн бага ангид заавал үзэх ёстой хичээлийн хөтөлбөрт тусгагдсан байдаг ч, дунд ангиас хойш ихэнх тохиолдолд үндсэндээ орхигддог. Харин Тарас Лэско гэгч залуугийн хувьд цаасаар урлах урлаг буюу оригами нь зөвхөн бага насны хобби байгаад зогссонгүй, одоо хүртэл төрөл бүрийн зүйлсийг цаасаар амьд мэт урласаар, оригамийг жинхэнэ урлагийн нүдээр амилуулж байна.

Тэрбээр Audi-ийн A7 авто загварыг цаасаар урласан нь харахад жинхэнэ мэт эх загвартайгаа яг цав ижилхэн болжээ. Уг автомашины цаасан загварыг бүтээхэд нийт 285 ширхэг цаас, бусад 750 ширхэг цаасны хэсэг, хэрчим орсон байна. Тарас Лэско өөрийн урлах авъяасыг бусдад батлан харуулахын тулд автомашиныг урлах явцдаа видео камераар бичиж, түүнийгээ гурван минутын бичлэг болгон YouTube сайтад тавьжээ. Лэско зөвхөн автомашины экстерьерийг цаасаар урлаад зогсолгүй, интерьерийг ч маш чадварлагаар дуурайлган хийсэн байна.