“Шотландын сүүлчийн эзэн хаан” /The Last King of Scotland/ киногоороо алдартай найруулагч Кевин МакДональд рок-н-роллын хаан Элвис Преслийн амьдралаас сэдэвлэн намтарчилсан кино бүтээхээр гэрээ үзэглэжээ. “Мемфис хүрэх сүүлчийн галт тэрэг” /Last Train to Memphis/ нэртэй энэхүү кинонд Элвисийн амьдралын эхэн үеийг харуулах гэнэ. Кино зохиолыг Америкийн зохиолч Питер Гуралникийн Элвис Преслийн намтраар бичсэн ижил нэртэй зохиолоос сэдэвлэн бүтээж байгаа ба продюсероор “Jagged Films”-ийн үүсгэн байгуулагч “Rolling Stones” хамтлагийн дуучин Мик Жаггер, Викториа Пийрмэн болон Стив Бингийн “Shangri-La” компанитай хамтран ажиллаж байгаа гэнэ.

Түүнчлэн “20th Century Fox” кино компанийн зүгээс “Мемфис хүрэх сүүлчийн галт тэрэг” кинонд Элвисийн дүрийг бүтээх жүжигчнээр шинэ залуу хүнийг тоглуулахаар 18-22 насны залуусын дунд нээлттэй сонгон шалгаруулалт зарлаад байгаа аж. 

Шотландын найруулагч Кевин МакДональдын хувьд үүнээс өмнө Ямайкийн алдарт дуучин Боб Марлийн тухай баримтат кино бүтээж байсан туршлагатай аж.