ОХУ-ын нийслэл Москва хотноо өнгөрсөн сард болсон хөнгөн атлетикийн дэлхийн аварга шалгаруулах тэмцээний үеэр домогт Усаин Болт сэтгүүлчдийн нэгэн асуултад өртсөн нь хэдий хүртэл уралдааны талбарт хүчтэй өрсөлдөгч нь байж, спортын замналаа хэдий хүртэл үргэлжлүүлэх тухай байв. Харин тэр сэтгүүлчдийн асуултаас сэмхэн “бултаж”, хариултыг эргэлзээтэй хэвээр үлдээж орхисон. Зарим нэг нь түүнийг 2016 оны олимпиос өмнө зодог тайлах бололтой ч гэж мэдээлж байв.

Тэгвэл, гүйлтийн богино зайд амьд домог гэгдэх болсон Усаин Болт өчигдөр мэдэгдэл хийж, 2016 онд Бразилийн Рио-де-Жанейрод болох зуны олимпийн дараа их спортоо орхино гэдгээ албан ёсоор зарлав. Бельгийн нийслэл Бруссель хотноо хийсэн хэвлэлийн бага хурлын үеэр тэрбээр “Риогийн олимпийн дараа… Хэрэв би форм сайтай байвал Риод очиж, хийх ёстой зүйлээ хийнэ. Удаан хугацаанд энэ спортод ноёрхож, амжилт буураагүй үедээ зодог тайлах нь цаг хугацааны хувьд хамгийн зөв үе” хэмээжээ.