АНУ-ын нэрт эрдэмтэн,  профессор Жак Уэдэрфордын “Өнөөгийн ертөнцийг үндэслэгч эзэн Чингис хаан” хэмээх алдарт ном АНУ-ын онлайн худалдааны AMAZON.COM-ын Аудибел сайтын дөрөв дэх жилдээ зохион байгуулж буй “Аудибелийн жилийн шилдэг аудио ном” шалгаруулах онлайн нээлттэй тэмцээнд “Уншигчийн таашаалд нийцсэн ном” төрөлд  ялалт байгуулан, шалгарчээ. Энэ талаар манай вебсайт та бүхэнд өмнө нь  мэдээлж байсан. Тэгвэл одоо хүргэх гэж буй мэдээлэл маань  Чингис хааны тухай дээрх бүтээл сүүлийн шатанд шалгаран, Америкийн шилдэг борлуулалттай номын жагсаалтанд ороод байгаа Матьхорний “Вьетнамын дайны тууж” номтой цомын төлөө өрсөлдөж байгаа  тухай юм. Вьетнамын дайны тухай өгүүлдэг энэ бүтээл AMAZON.COM –ын оны шилдэг номоор шалгарч байсан хүчтэй өрсөлдөгч юм.

Хэрвээ "Өнөөгийн ертөнцийг үндэслэгч Эзэн Чингис хаан" ном энэ өрсөлдөөнд ялбал 2011 оны “Уншигчдын таалалд нийцсэн шилдэг аудио ном” цомын эзэн болох юм. Цомын төлөөх өрсөлдөөн Монголын цагаар өнөөдрийн 24.00 цаг хүртэл үргэлжлэх учир та бүхэн эзэн Чингис хааны тухай дэлхийн шилдэг бүтээлд амжиж саналаа өгөхийг уриалж байна. Саналаа www.jwf.mn хаягаар өгөх юм.  

Дашрамд дурдахад, эрдэмтэн  профессор Жак Уэдэрфордын “Өнөөгийн ертөнцийг үндэслэгч эзэн Чингис хаан” ном маань анх 2004  онд АНУ-д хэвлэгдэн гарсан даруйдаа “Нью-Иорк Таймс”-ын шилдэг борлуулалттай (New York Times Best Seller) номын жагсаалтад албан ёсоор багтаж, одоогоор Орос, Турк, Грек, Хятад, Тайланд, Япон, зэрэг олон хэлнээ хэвлэгдэн, дэлхийн уншигчдад Чингис хааны гайхамшигтай түүхийг таниулж байгаа юм.