Төрийн гурван өндөрлөг жил бүр хичээлийн шинэ жилийн нээлтэд оролцдог уламжлалтай. Тэгвэл УИХ-ын дарга З.Энхболд есдүгээр сарын 1-нд 08.00 цагт нийслэлийн 84-р сургуулийн хичээлийн шинэ жилийн нээлтийн үйл ажиллагаанд оролцох юм байна. УИХ-ын даргатай хамт УИХ-ын Нийгмийн бодлого, боловсрол, шинжлэх ухааны байнгын хорооны дарга З.Баянсэлэнгэ 84-р сургуулийн нээлтэд оролцох аж. Одоогоор Ерөнхий сайд, Монгол Улсын Ерөнхийлөгч нар аль сургуулийн хичээлийн шинэ жилийн нээлтэд оролцох нь тодорхойгүй байна.

Боловсрол, шинжлэх ухааны сайд Л.Гантөмөр 58 дугаар сургууль, 14 дүгээр цэцэрлэгүүдийн нээлтэд оролцох бол УИХ-ын гишүүн Ц.Даваасүрэн нэгдүгээр сургууль дээр, УИХ-ын гишүүн Р.Бурмаа “Шинэ үе” дунд сургууль, УИХ-ын гишүүн Г.Баярсайхан тавдугаар сургууль, УИХ-ын гишүүн М.Батчимэг “Орчлон” ерөнхий боловсролын сургууль, УИХ-ын гишүүн О.Баасанхүү Орос гуравдугаар сургуулийн хичээлийн шинэ жилийн нээлтэд тус тус оролцох юм байна. Мөн Боловсрол, шинжлэх ухааны дэд сайд Б.Ургамалцэцэг 55 дугаар сургууль, 137 дугаар цэцэрлэгүүдийн нээлтэд оролцох аж.