Түүхэн кинонд түүхэн хүний дүр бүтээнэ гэдэг ямар ч чадварлаг жүжигчний хувьд бэрх даваа. Тэгвэл, Уэльсийн гүнж Дианагийн нууцлаг амьдралын сүүлийн хоёр жилийг өгүүлэх “Диана” киноны гол дүр болох гүнжийн дүрийг Британийн жүжигчин Наоми Уаттс бүтээхээр болсон билээ. Германы найруулагч Оливер Хиршбигелийн найруулгаар бүтсэн тус киноны ажил үндсэндээ дуусч, олон нийтэд хүргэхэд бэлэн болжээ. Тов ёсоор “Диана” кино ирэх есдүгээр сарын 20-ноос Лондон хотын кино театруудаар гарч эхлэх ажээ.

Киноны уран бүтээлчид харин энэ цаг мөчид Хатан хааны гэр бүлийнхнээс нэлээд эмээж байгаа гэнэ. Нийгэм, үзэгчдээс гадна Диана гүнжийн гэр бүл энэхүү киног хэрхэн хүлээж авах эсэх нь тэдний санааг зовоож буй аж. Тэр тусмаа гол дүрийн жүжигчин Наомигийн хувьд ханхүү Уильямын сэтгэгдэл тун чухал, түүнээс эмээж буйгаа ч илэрхийлжээ.

Наомид энэ дүрийг бүтээх санал ирэхэд хоёр ч удаа татгалзсан боловч эцэстээ зөвшөөрсөн байна. Ямартай Наоми Уаттсын амилуулсан Диана гүнж тун удахгүй үзэгчдийн хүртээл болоход бэлэн болжээ.