2013 оны насанд хүрэгчдийн жүдо бөхийн дэлхийн аварга шалгаруулах тэмцээн Бразилын Рио Де Жанейро хотноо өнөөдөр нээлтээ хийнэ. Ирэх есдүгээр сарын 1-ний өдөр хүртэл үргэлжлэх энэ удаагийн ДАШТ-д 123 орны эрэгтэй 420, эмэгтэй 260 нийт 680 тамирчин өрсөлдөхөөр мэдүүлгээ ирүүлжээ. Манай улсаас эрэгтэй 10, эмэгтэй есөн бөх ДАШТ-нд оролцох юм. Энэ жилийн дэлхийн аваргын нэг онцлог нь Олон улсын жүдо бөхийн холбоо /IJF/-ноос баталсан шинэ дүрмийн дагуу болох юм. Өмнө нь ДАШТ-д оролцож буй улсуудын хувьд нэг жинд тус бүр хоёр тамирчнаа сойх эрхтэй байсан бол энэ жилээс эхлэн эрэгтэй, эмэгтэй төрөлд тус тус есөн тамирчнаа оролцуулж байна. Аль жинд хэдэн тамирчин оролцуулах эсэхийг тухай улсын жүдогийн холбоо шийдэх эрхтэй бөгөөд Монголын жүдо бөхийн холбооны тухайд эрэгтэйчүүдийн барилдаанд хөнгөн жиндээ гол анхаарлаа хандуулж, 60, 66 ба 73 кг-ын жинд тус тус хоёр тамирчнаа оролцуулахаар шийдвэрлэжээ. Манай тамирчдын хувьд ДАШТ-нээс бүгдээрээ медаль авах боломжтой жингийнхээ шилдгүүд юм.

Эрэгтэйчүүдийн 66 кг-ийн жинд өрсөлдөх ОУХМ С.Мияарагчаа, Д.Төмөрхүлэг,  73 кг-ийн жинд МУ-ын Гавьяат тамирчин Х.Цагаанбаатар, С.Ням-Очир нар эхний тойрогтоо хийлж, хоёрдугаар тойргоос эхэлж барилдана.  Харин 60 кг-ийн жинд ОУХМ Д.Амартүвшин эхний тойрогтоо БНАСАУ-ын Жан Хьюк Чолтой, ОУХМ Г.Болдбаатар Австрийн Людвиг Пэйшертэй учраа таарсан байна. 60 кг-ийн жинд барилдах Д.Амартүвшин, Г.Болдбаатар нар нэг зоонд багтсан байна. Түүнчлэн эмэгтэйчүүдийн 48, 52, 57 кг-ийн жингийн бөхчүүд эхний тойрогтоо бүгд хийлсэн байна.

ДАШТ-д оролцох Монголын шигшээ багийн бүрэлдэхүүн:

ЭРЭГТЭЙ:

    60 кг: Д.Амартүвшин, Г.Болдбаатар
    66 кг: С.Мияарагчаа, Д.Төмөрхүлэг
    73 кг: Х.Цагаанбаатар, С.Ням-Очир
    81 кг: О.Ууганбаяр
    90 кг: Х.Цогтгэрэл
    -100 кг: Б.Тэмүүлэн
    +100 кг: Б.Сугаржаргал

ЭМЭГТЭЙ:

    48 кг: М.Уранцэцэг, Г.Отгонцэцэг
    52 кг: А.Цолмон, Б.Бат-Эрдэнэ
    57 кг: Д.Сумъяа
    63 кг: Ц.Цэрэннадмид, Б.Мөнгөнчимэг
    70 кг: Ц.Наранжаргал
    78 кг: Т.Мөнхтуяа  

Жүдо бөхийн дэлхийн аварга шалгаруулах тэмцээний барилдааны хуваарийг танилцуулъя.

VIII.26
Эрэгтэй 60 кг
Эмэгтэй 48 кг

VIII.27
Эрэгтэй 66 кг
Эмэгтэй 52 кг

VIII.28
Эрэгтэй 73 кг
Эмэгтэй 57 кг

VIII.29
Эрэгтэй 81 кг
Эмэгтэй 63 кг

VIII.30
Эрэгтэй 90 кг
Эмэгтэй 70, -78 кг

VIII.31
Эрэгтэй -100, +100 кг
Эмэгтэй +78 кг

IX.01
Эрэгтэй, эмэгтэй багийн барилдаан