Энд “Оюутолгой далд уур­хайгаа зогсоож, 1700 ажилч­наа халлаа” гээд айгаад эмээгээд байсан чинь тэнд Эдийн засгийн хөгжлийн сайд Н.Батбаяр бөөн баяр сууж байгаа бололтой юм. “Юу яасан Оюутолгой вэ. Япон­чууд бидэнд их мөнгө өгнө гэсэн. Бүр тоолж барашгүй их гээд бод доо” гэх маягаар. Түүнийгээ зурагтаар хүртэл нуулгүй “Япончууд удахгүй хязгааргүй их мөнгө өгнө. Түүгээр нь бүх үйлдвэрийг барина” гэж мэдэгдэв. Тэгээд ч зогсохгүй тэр өдрийнхөө маргааш нь Гиннесд бүртгүүлэх 10 мянган морины цувааг тэргүүлж яваа харагдсан.Гол нь тэр хүний сэтгэл ийм сайхан тэнэгэр байхад энд мань мэтээс эхлээд сандарч тэвдэх хэрэг байна уу. Ингэж бодсон чинь зүрх амарч, сэтгэл тэнийж, амьсгалахад хүртэл аятай таатай болж байгаа гэж жигтэйхэн.

Тэр ч битгий хэл Эдийн засгийн хөгжлийн сайдынхаа уужим сайхан сэтгэлд дэм болж, санасан сэдсэн бүхнийг нь сэтгэлчлэн бүтээх ерөөл дэлгэхээр шийдэв. Ингэхдээ Японоос орж ирэх тэр их мөнгөөр нь үйлдвэр бариулж зовоох хэрэггүй юм гэж бодлоо. Харин түүнийх нь оронд шууд л “Усэйн Болтын угшлын адуу”-н сүргийг мян­га, түмээр нь худалдаад авчих­на. Тэгээд тэргүүн адууч­наар нь Н.Батбаяр сай­дыгаа зална. Тэр үед хөх мөнх тэнгэр Монголыг минь ивээж, хөрст алтан дэл­хий биднийгээ түшэх нь гар­цаа­гүй. Нэгэн цагт морин дэл дээрээс дэлхийг эзэлж бай­сан ард түмний хувьд энэ цагт морь шүтэгч сайдынхаа хүчээр дэлхийг сөхрүүлж яа­гаад болохгүй гэж. Тэгээд ч манай сайд чинь мань мэтийг бодоход л эзэн Чингис хаа­ны үеийн амьдралыг “экспортлох” ид шидтэй юм гэсэн шүү. Иймд түүний эрдэм мэдлэгт зориулан Японоос ирэх мөнгөөр “Усэйн Болтын угшлын адуу” авчихаад амар тайван жаргацгаая, мон­голчууд аа.

“Усэйн Болтын угшлын адуу” нь бөөн ид шид. Олим­под төрүүлдэг хүнээсээ, хувь илүү. Эдийн засгийн хөгжлийн сайдыг тэнгэрт хүргэж, далайд шумбахад тусална. Үр төл нь их удалгүй гурван сая хүрэх монголчуудыг түүний араас авч давхина. Ин­гээд бүгдээрээ тэнгэрт нисч, далайд шумбасан шигээ амьдрах учраас бидэнд улс орны эдийн засгийн өсөлт бууралт ямар ч хамаагүй болох нь тодорхой.