Монгол Улсын Ерөнхийлөгч Ц.Элбэгдорж маргааш ҮАБЗ-ийн гишүүн асан эрхмүүдтэй уулзах гэж байна. Энэ тухайгаа тэрээр твиттер хуудсандаа жиргэжээ. Монгол Улсын үе үеийн Ерөнхийлөгч, УИХ-ын дарга нар, Ерөнхий сайдуудтай тэрээр уулзаж эдийн засаг, хөрөнгө оруулалт, санхүүгийн талаар мэдээлэл сонсч шийдэл ярилцах юм байна.

Улсын эдийн засгийн амин чухал асуудлуудаар үе үеийн хашир туршлагатай эрхмүүдтэй уулзаж тэдний үгийг сонсоно гэдэг чухам л “Ахмадын сургааль алт” байлгүй яахав. Эдийн засаг, хөрөнгө оруулалтын тухай нарийн ширийн зүйл ярилцах учраас эл уулзалтыг хаалтай хийхээр болжээ. Харин уулзалтын дараа сэтгүүлчид ҮАБЗ-ийн гишүүн асан, төрийн гурван өндөрлөгийг түшиж явсан эрхмүүдтэй уулзаж ярилцлага, тодруулга авч болох ажээ.

Уулзалтад Монгол Улсын Ерөнхийлөгч асан П.Очирбат, Н.Багабанди, УИХ-ын дарга асан Р.Гончигдорж, Ц.Нямдорж, Д.Лүндээжанцан, Д.Дэмбэрэл, Ерөнхий сайд асан Д.Содном, Ш.Гунгаадорж, Д.Бямбасүрэн, М.Энхсайхан, Р.Амаржаргал, С.Баяр, Сү.Батболд нарын олон хүн оролцож улсынхаа эдийн засгийн чухал асуудлуудыг ярилцахаар болсон дуулдана.