Филиппинийг дайран өнгөрөхдөө хоёр хүний аминд хүрч, олон зуун байшин барилгыг эвдэн сүйтгэж, их хэмжээний хөрсний нуралт үүсгэсэн Утор далайн хар салхи Хятадыг чиглэн айсуй. Филиппинийг 200 км/цагийн хурдтайгаар ниргэсэн далайн хар салхины хүч бага зэрэг суларсан хэдий ч Өмнөд Хятадын тэнгисийн эрэг орчмын хотуудад цаг агаарын онц байдал зарлажээ. Хятадын далайн тэнгисийн орчны цаг уурын төвийн мэдээлснээр Утор далайн хар салхи маргааш орой гэхэд Өмнөд Хятадын тэнгисийн эрэгт орших Гуандун мужид хүрч, хөрсний нуралт үүсгэх магадлалтай байгаа гэнэ.

Түүнчлэн Утор далайн хар салхины нөлөөгөөр өнөөдөр өдрөөс хойш Өмнөд Хятадын тэнгис дэх усны давалгаа 10 метр, Гуандун мужийн эргийн баруун бүс нутгаар 5.5 метрт хүрч давалгаалах тооцоо гарчээ. Харин Гуандунтай залгаа орших Хайнань мужийн зүүн хойд хэсгээр тэнгисийн давалгаа 3.5-4.5 метрт хүрч давалгаалах юм байна.

Утор далайн хар салхи нь энэ жилийн хувьд Хятадыг дайрч буй 11 дэх хар салхи аж. Хятад нь цаг уурын аюултай түвшнийг тодорхойлсон цэнхэрээс шар, шаргал, улаан руу хувирах дөрвөн өнгийн анхааруулах дохиоллын системтэй юм байна.