Монголын хөлбөмбөгийн холбоо, “АПУ” ХК-тай хамтран зохион байгуулдаг Үндэсний “Нийслэл Лиг” тэмцээний тоглолтууд Дулааны IV цахилгаан станцын хөлбөмбөгийн талбай дээр болж байна. Энэ сарын 5-нд эхэлсэн "Нийслэл Лиг"-д дөрвөн тоглолт явагдаад байна. Эхний тоглолт Эрдэнэт хотын "Хангарьд" клуб дээр явагдсан бол дараагийн тоглолтууд Улаанбаатар хотноо болж байна.

Дөрөв дэх тоглолт Дулааны IV цахилгаан станцын хөлбөмбөгийн талбай дээр "Хоромхон" vs Улаанбаатар их сургуулийн хооронд болоход 2:0-ийн харьцаагаар Улаанбаатар их сургуулийн баг ялалт байгуулсан байна.

Ингээд өчигдрийн тоглолтын дэлгэрэнгүйг танилцуулья.

“Улаанбаатар” Их Сургуулийн хагас хамгаалагч Г.Батцэнгэл тоглолт эхлээд удалгүй 7 дахь минутад гоолдож тооны харьцааг 1:0 болгосон юм. Үүнээс хойш хоёр баг тун ширүүн өрсөлдөөнийг үзүүлж байсан ч гоол орох дургүй байлаа. 2-р үеийн эхэнд “Хоромхон” клубийн хаалгач Б.Мөнхболд гэмтэл авч талбайг чөлөөлсөн юм. Тоглолтын төгсгөлд Цэнд-Аюуш, Дарамбаяр, Наранболд нарын хэд хэдэн аюултай цохилтыг “УБИС” багийн хаалгач ОУХМ Ж.Энхбаяр гайхалтай хааж багаа аварч байлаа. Шүүгчийн мэдлийн цагт “УБИС”-ийн сөрөг довтолгоо амжилтанд хүрч Э.Пүрэвдоржийн хүчтэй цохилт гоол болсноор тоглолтын хувь заяа бүрэн шийдэгдсэн юм.

ХОРОМХОН: А.Батболд (C), Н.Наранболд, Д.Төрбат, О.Оюунбаатар, Ц.Мөнгөншагай (Х.Цэнд-Аюуш), Б.Баярсүрэн (Э.Лхагвасүрэн), Б.Мөнхболд (GK) (Э.Отгонпүрэв), У.Содгэрэл, Д.Мөнхдөл, Ц.Дарамбаяр, Г.Жавхлан

УБИС: О.Очбаяр, Г.Батцэнгэл, Э.Ганзориг(C), Г.Баярсайхан, Ө.Одбаяр, А.Хонгорзул (Н.Цэдэнбал), Б.Эрдэнэтөгс, Э.Пүрэвдорж, Ц.Мөнхтулга (Д.Лүмбэнгарав), Л.Мөнгөншагай (Г.Ёндонжамц), Ж.Энхбаяр (GK)