Монголын хөлбөмбөгийн холбооны 2011 оны Үндэсний “Нийслэл лиг”-ийн сугалааны үйл ажиллагаа өнөөдөр 11.00 цагаас “Чингис” зочид буудалд боллоо. Ирэх сарын эхний өдөр эхлэх лигийн тэмцээнд “Эрчим”, “Хангарьд”, “Хоромхон”, “Улаанбаатарын унаганууд”, “Улаанбаатарын мазаалайнууд”, “Сэлэнгэпресс”, “Хүлгүүд”, “ФС Улаанбаатар” гэсэн найман багийн 172 тамирчин оролцох мэдүүлгээ өгсөн. Энэ дунд япон, нигери, хойд солонгос, турк легионерүүд ч байна. Багууд хоёр тойрог тоглож, эхний хоёр байрт шалгарсан баг аваргын төлөө, харин гурав, дөрөвдүгээр байр эзэлсэн багууд хүрэл медалийн төлөө өрсөлдөх юм.

Сугалааны үйл ажиллагаанд дээд лигийн клубүүдийн эзэн, ивээн тэтгэгч, тоглогчид хүрэлцэн ирсэн. Энэ үеэр МХБХ-ноос баг бүрт нэг сая төгрөгийн үнэтэй бөмбөг гардуулсан юм. Түүнчлэн зарим клубын дасгалжуулагч нарыг 2011 он дуустал цалинжуулахаар шийдвэрлэснээ дуулгалаа.

Дашрамд сонирхуулахад, 15 дахь удаагийн “Нийслэл лиг”-ийн тэмцээний шагналын сан 20 сая төгрөг болсон нь өмнөх жилийнхээс хоёр дахин өссөн дүн ажээ.

"Нийслэл лиг"-ийн нээлтийн ажиллагаа ирэх сарын 1-нд Монголын хөлбөмбөгийн ногоон талбайд болох бөгөөд аварга баг есдүгээр сарын 18-нд тодорно.